Kryeministrja e ekstremit të djathtë të Italisë, Giorgia Meloni, deklaroi të enjten se ndërhyrjet politike të Elon Musk-ut shkaktonin zemëratë vetëm sepse ai nuk ishte i majtë dhe se të huajt kishin ndërhyrë në politikën italiane për vite me radhë.
Meloni, drejtuesja e partisë post-fashiste Vëllezërit e Italisë, tha se Musk po ushtronte të drejtën e tij për fjalën e lirë. Në vend të kësaj, ajo akuzoi njerëz të fuqishëm të majtë, përfshirë financierin miliarder dhe filantropin George Soros, për ndërhyrje politike.
“Problemi lind kur njerëz të pasur përdorin burimet e tyre për të financuar parti, shoqata dhe eksponentë politikë anembanë botës për të ndikuar në zgjedhjet politike të shteteve,” tha Meloni në një konferencë për shtyp.
“Musk nuk po e bën këtë,” këmbënguli ajo.
“Elon Musk financoi një fushatë zgjedhore në vendin e tij, për kandidatin e tij, në një sistem ku, do të theksoja, kjo është mjaft e zakonshme,” tha ajo.
“Por unë nuk jam në dijeni që Elon Musk ka financuar parti, shoqata apo eksponentë politikë anembanë botës.
“Për shembull, këtë bën George Sorosi,” pretendoi Meloni.
“Dhe po, unë e konsideroj këtë ndërhyrje të rrezikshme në punët e shteteve dhe në sovranitetin e tyre,” shtoi ajo.
Kritika ndaj Sorosit
I përçmuar nga konservatorët dhe shpesh objekt i teorive antisemite, Soros përdori pasurinë e tij, të fituar si financier në vitet 1970 dhe 1980, për të krijuar Fondacionet e Shoqërisë së Hapur (OSF). Këto mbështesin një gamë të gjerë kauzash dhe OJQ-sh në mbarë botën, duke përfshirë programet për qeverisje të mirë dhe ndërtimin e demokracisë deri te nismat liberale për politika publike.
Ai ka qenë një donator i madh gjatë zgjedhjeve në SHBA, por nuk zotëron një rrjet social apo një pozicion në qeveri.
‘Jo i majtë’
“A është problemi se Elon Musk është i fuqishëm dhe i pasur apo që ai nuk është i majtë?” pyeti Meloni, e cila e ka përshkruar Musk si një “gjeni”.
Ajo kritikoi “ata që deri dje përshkruanin eksponentët e financave të mëdha, të cilët shpesh luajnë kundër shteteve dhe financojnë eksponentë politikë, si të admirueshëm, si filantropi”.
Meloni tha se ajo nuk kishte marrë para nga Musk-u, “ndryshe nga ata që kanë marrë nga Sorosi”.
Ajo mohoi raportimet mediatike se qeveria e saj është pranë nënshkrimit të një marrëveshjeje të madhe dhe të diskutueshme për sigurinë kibernetike me kompaninë e Musk, SpaceX.
Meloni tha se përmbahej nga komentimi i politikës së brendshme të vendeve të tjera, por theksoi se ajo vetë kishte qenë në mënyrë të përsëritur viktimë e sulmeve.
Ajo krahasoi zemërimin “e majtë” ndaj mbështetjes së hapur të Musk-ut për Alternativën e Djathtë për Gjermaninë (AfD) përpara zgjedhjeve atje me heshtjen “e majtë” ndaj asaj që ajo tha ishte “ndërhyrje” nga politikanë të lartë gjermanë në zgjedhjet e përgjithshme të Italisë të vitit 2022.
Dy herë gjatë konferencës për shtyp, Meloni iu referua gabimisht Musk-ut si Donald Trump.
Nismat politike të Musk-ut janë ngushtësisht të lidhura me interesat e tij ekonomike, sugjerojnë ekspertët.
Ai është një mbështetës entuziast i Melonit, liderja më e djathtë e Italisë që nga viti 1945.
Marrë nga France 24
