Mediat italiane raportojnë se Giorgia Meloni ka udhëtuar drejt SHBA-së dhe destinacioni i saj është rezidenca e Donald Trump në Mar-a-Lago, Florida. “Misioni sekret”, i organizuar me kujdes të madh, ndodh dy javë para se republikani të marrë detyrën në Shtëpinë e Bardhë dhe disa ditë përpara vizitës së Joe Biden në Itali. Nuk përjashtohet që arsyeja e këtij udhëtimi të papritur në Shtetet e Bashkuara të ketë lidhje me çështjen e gazetares italiane Cecilia Sala, e cila mbahet në burgun Evin në Teheran, raporton Reuters.
Gjithashtu, është e mundur që ndër temat e diskutuara të jenë edhe luftërat në Ukrainë dhe Lindjen e Mesme, çështja e tarifave doganore, dhe më gjerësisht marrëdhëniet SHBA-BE. Meloni synon të jetë një urë lidhëse mes Evropës dhe administratës së re të Trump.
Avioni i kryeministres u ngrit në fluturim të shtunën paradite, pak pas orës 11:00, dhe pas një ndalese teknike në aeroportin ndërkombëtar të Shannon-it në Irlandë, vazhdoi udhëtimin dhe rreth mesnatës me orën italiane do ta çonte në Shtetet e Bashkuara. Takimi në Mar-a-Lago është planifikuar në orën 1:30 me orën italiane.
Njeriu i Melonit konfirmoi vizitën
Misioni i Melonit përtej Atlantikut është konfirmuar edhe nga burime italiane, ndërsa përfaqësuesi i Elon Musk në Itali, Andrea Stroppa, në X publikoi një postim me flamujt e Italisë dhe Shteteve të Bashkuara, i shoqëruar nga një imazh i krijuar me inteligjencë artificiale, ku shihen kryeministrja, Trump dhe Musk të veshur me veshje të Romës së lashtë.
Marrë nga Balkanweb.com
