Papa Françesku ka thënë se i kishte shpëtuar një sulmi të dyfishtë vetëvrasës gjatë një vizite në Irak tre vjet më parë, pasi tentativat për vrasjen e tij u penguan nga inteligjenca britanike dhe policia irakiane.
Françesku ka thënë se ai ishte këshilluar fuqimisht të mos bënte udhëtimin në Irak në mars të vitit 2021, i pari nga një papë atje , sepse pandemia me Covid ishte ende e përhapur teksa rreziqet e sigurisë ishin të larta, veçanërisht në Mosul, qytetin verior të shkatërruar nga militantët e Shtetit Islamik.
Megjithatë, Papa ka thënë se ishte i vendosur të vazhdonte udhëtimin.
Papa ka përshkruar se si një nga sulmuesit vetëvrasës ishte një grua që po shkonte drejt Mosulit për të hedhur veten në erë gjatë vizitës së tij. Një kamion gjithashtu “ishte nisur me shpejtësi atje me të njëjtin qëllim”, ka bërë të ditur ai.
Françesku ka kryer udhëtim tre-ditor në gjashtë qytete irakiane, duke thënë në atë kohë se po udhëtonte si “një pelegrin i paqes”.
Duke qëndruar në rrënojat e një kishe në Mosul, Papa i kërkoi komunitetit të krishterë në pakësim të vendit që të falte padrejtësitë ndaj tyre nga ekstremistët.
Gjatë vizitës, rreth 10,000 policë irakianë ishin vendosur për të mbrojtur Papën.
Marrë nga The Guardian
