Gjermania u përball me një zhgënjim të madh në gjysmëfinalen e Nations League, duke humbur ndaj Portugalisë në një ndeshje që Julian Nagelsmann e quajti “një nga më të dobëtat e 18 muajve të fundit”. Me gjithë serinë pozitive prej tetë ndeshjesh pa humbje, atmosfera dhe entuziazmi në kampin gjerman u shua shpejt.
Tekniku 37-vjeçar pranoi hapur problemet që çuan në këtë rezultat negativ:
“Na mungoi uria dhe agresiviteti për të luftuar për çdo top”. Sipas tij, mungesa e lojtarëve të rëndësishëm si Rüdiger, Musiala dhe Schlotterbeck nuk ishte justifikim. Problemi kryesor ishte mungesa e intensitetit dhe përkushtimit nga disa futbollistë, sidomos në pjesën e parë, kur Gjermania nuk e kishte kontrollin e ndeshjes.
“Kur luan një për një dhe disa lojtarë nuk japin 100 për qind, përfundon në inferioritet numerik,” tha Nagelsmann. Ai theksoi se përballë kombëtareve si Portugalia, që kanë më shumë lojtarë me kreativitet dhe instinkt individual, Gjermania duhet të jetë gjithmonë në nivel maksimal.
“Ky është një mësim i mirë. Duhet të mësojmë dhe të përmirësohemi,” shtoi ai, duke vënë theksin te rëndësia e përgatitjes për ndeshjen për vendin e tretë, që do të luhet të dielën kundër humbësit të duelit Spanjë–Francë.
Për Gjermaninë, kjo ndeshje është më shumë se sa për një medalje bronzi, është testi i karakterit për një skuadër që synon të rikthehet në majat e futbollit evropian.
Marrë nga Syri.net
