Disa dhjetëra banorë të fshatit Rrjoll në Velipojë u përplasën të mërkurën me policinë në afërsi të një zone 2.2 kilometra nga fshati ku filluan punimet për resortin turistik Blue Borgo, i cili ka marrë statusin e investimit strategjik nga qeveria në mbledhjen e 30 dhjetorit 2024.
Banorët e zonës kërkuan ndalimin e punimeve deri në sqarimin e statusit të pronës që ata pretendojnë se po u përvetësohet përmes dokumenteve të falsifikuara.
“Kam 400 dynym tokë me dokumente të rregullta, me vendime gjykate të vitit 1996 dhe 2008. Askush nuk më ka thënë se prona ime është marrë. Para një jave, më njoftuan se po punohej në tokën time,” thotë Ndue Shullani, një prej banorëve protestues.
Për shkak se banorët tentuan të kalonin kordonin e policisë dhe të pengonin punimet, forca të policisë përfshi ato të ndërhyrjes së shpejtë shoqëruan 6 prej tyre. Në videot e bëra publike nga banorët shihet policia, më e shumtë në numër se protestuesit, të shoqërojë disa prej tyre.
Kryeplaku i fshatit Rrjoll Lucë Toli, tha për medias se shoqërimi i banorëve dhe ndërhyrja e policisë ishte e padrejtë. Ai tha se ata kërkonin të sqaroheshin mbi statusin e pronës, që sipas tij u përket banorëve. “Shoqëruan rreth 6-7 banorë. Ndërkohë punimet vazhdojnë atje pa i dhënë llogari kujt”, tha Toli, që shtoi se as policia dhe as kompania nuk kishin paraqitur letra.
Banorët thonë se një person i panjohur në zonë, i identifikuar prej tyre si Fatmir Shpellza paraqitej si pronarë i 1500 dynymëve, përfshi edhe zonën ku po investohet. Ata thonë se kanë dokumente që toka është në pronësi të 60 familjeve nga fshati që prej vitit 1920. “Unë dua të ballafaqohem me letrat e personit. Është transferuar prona, është marrë në mënyrë të dyshimtë. Nuk e njohim këtë person, del me 1500 dynym tokë. E di Fatmir Shpellza me kë e ka bërë”, tha Prek Molla, banor i zonës.
Për arrestimin e banorëve reagoi kryetarja e Partisë Demokratike në Shkodër, e cila kërkoi lirimin e menjëhershëm të tyre. “E drejta për të protestuar është e drejtë kushtetuese dhe nuk mund të pengohet nga askush, e aq më pak nga policia e shtetit. Këta banorë nuk kërkojnë asgjë më shumë se sa dialogun dhe njohjen me faktet dhe pretendimet e tyre nga organet ligjzbatuese”, deklaroi Eliona Shkreli.
Resortin turistik Blue Borgo po ndërtohet nga kompania Gener 2 dhe Aba Blue Bongo, edhe kjo në pronësi të vëllezërve Ulaj. Kompania ka marrë statusin e investitorit strategjik dhe do të ndërtojë mbi një sipërfaqe prej 147 hektarësh në bregdetin mes Rana e Hedhun dhe Velipojës. Sipërfaqja e zënë nga investimi është në kategorinë e peizazheve të mbrojtura.
Të ashtuquajturat investime strategjike kanë hasur edhe më herët kundërshti të banorëve kryesisht për shkak të konfliktit të pronësisë. Kompania Gener 2 dhe Fatmir Shpellza nuk qenë të arritshëm për koment.
Marrë nga Reporter.al
