• Sot u zhvillua seanca plenare e radhës në Kuvendin e Shqipërisë. PS ka rrëzuar kërkesën e opozitës për zhvillimin e mocionit me debat lidhur me gjetjet e OLAF për abuzimet me fondet e BE, të caktuara për fermerët shqiptarë. Kreu i Grupit Parlamentar të PD-së, Gazment Bardhi reagoi ashpër ku tha se rrëzimi i kërkesës së tyre nuk ishte kompetencë, as e Konferencës së Kryetarëve ,as kryetares së Kuvendit. Ai tha se raporti i OLAF e ka shpallur ministrinë e Bujqësisë “skenë krimi”, pas abuzimeve me fondet për bujqësinë.
• Në rendin e ditës sot ishte dhe diskutimi lidhur me projektdeklaratën për heqjen e ligjit të luftës me Greqinë. Mazhoranca dhe opozita bashkuan votat e tyre dhe deklarata e sjellë nga kreu i PDIU-së, Shpëtim Idrizi është miratuar me 96 vota pro. Asnjë deputet nuk ka votuar kundër projekt-deklaratës.
• Ndërkohë është zhvilluar interpelanca me ministren e Arsimit dhe Sportit, Ogerta Manastirliu. Deputetja e Partisë së Lirisë Erisa Xhixho ka renditur disa nga skandalet që kanë ndodhur me arsimin në vend. Duke folur nga foltorja e Kuvendit, Xhixho ka theksuar se nga pedofilat në shkollë në vitin 2021 ne kemi ardhur në vitin 2024 te profesorat e artit që shpërndajnë drogë. Po ashtu Erisa ka kërkuar nga Ministria një analizë se përse kemi rënë në rezultatet e PISA-s. Pas fjalës së Xhixhos, Manastirliu i është përgjigjur asaj duke u shprehur se të gjitha çështjet qe ajo preku janë duke u bërë në rritjen e cilësisë. Ministria Manastirliu shtoi se, ata premtuan se do rrisnin rrogat e mësuesve dhe këtë e bën realitet në këtë mandat. Ajo më tej u shpreh se ata kanë ndërtuar një sistem të ri dhe kjo skemë parashikon shpërblime për mësuesit e kualifikuar dhe mësuesit mjeshtër.
• Deputeti Agron Shehaj ka deklaruar se nga fondet e Bashkimit Evropian për fermerët janë vjedhur 33 milion euro. Duke folur nga foltorja e Kuvendit, Shehaj ka theksuar se sipas raportit të OLAF, këto para në vend që të shkonin te fermerët, kanë shkuar në xhepat e pushtetarëve. • Shehaj ka deklaruar se qeveria vodhi paratë që duhej të shkonin te fermerët dhe se në dijeni të kësaj kanë qenë Delina Ibrahimaj, Frida Krifca dhe Ilir Beqaj. Ministrja e Bujqësisë Anila Denaj ka deklaruar se raporti i zyrës së OLAF për abuzimet me fondet e bujqësië ka shkuar në organet e drejtësisë. Duke folur nga Kuvendi, Denaj ka deklaruar se nga IPARD 2 janë mbështetur 540 investime nga veriu në jug dhe janë krijuar vende punësimi për më shumë se 1000 punonjës. Po ashtu Denaj, ka theksuar se është miratuar struktura e re për AZHBR, që sipas saj forcon mekanizmat parandalues. Deputeti Agron Shehaj ka nxjerr disa nga emrat që sipas tij kanë abuzuar me fondet e IPARD. Duke folur në interperlancën me Ministren Anila Denaj, Shehaj ka deklaruar se fondet nuk kanë shkuar te fermerët që kanë nevojë, por te ish-deputeti i PS-së, Dashamir Peza, apo vëllait të ish-drejtorit Taulant Tusha. Shehaj ka theksuar se këta kanë ndërtuar vila ndërkohë që femerët duhej të merrnin fondet për tu mbështetur në prodhimet e tyre.
• Avokatja e Popullit, Erinda Ballanca ka bërë sot në Kuvend raportimin e saj për vitin 2023. Ballanca u pyet nga deputetët lidhur me rastin e arrestimit të Fredi Belerit se përse institucioni i saj nuk është prononcuar. Ajo tha se ka patur një raport nga institucioni i saj që i është drejtuar policisë së shtetit dhe prokurorisë. Avokatja e popullit Erinda Ballanca foli në Kuvend lidhur me ligjin e legalizimeve të Kadastrës ku sipas saj ky i fundit lexohet gabim. Gjithashtu Ballanca foli edhe për rastin e 5 majit, ku tha se është bërë një raport përgjysmues, dhe se vlerëson të bëhen ndryshime në ligj. Avokatja e Popullit Erinda Ballanca në Kuvend theksoi rolin thelbësor të këtij institucioni në mbrojtjen e të drejtave të njeriut në Shqipëri, duke paraqitur raportin për gjendjen e të drejtave për vitin 2023. Ballanca vlerësoi progresin e bërë, por gjithashtu evidentoi sfidat ende të pranishme. Raporti vjetor përfshin analiza të detajuara dhe histori njerëzore, duke theksuar rëndësinë e dëgjimit të zërave të atyre që kanë përjetuar pengesa në jetën e tyre të përditshme. Avokatja e Popullit kërkoi ndjekjen e rekomandimeve të saj me përgjegjshmëri, duke theksuar nevojën për një shoqëri më të drejtë dhe të barabartë. Ajo përmendi sfidat e zgjedhjes së një Avokati të ri të Popullit dhe emërimin e komisionerëve të rinj. Institucioni trajtoi gjithsej 7056 raste dhe kërkesa gjatë vitit 2023, duke ofruar këshillime dhe orientime për qytetarët.
