Raporti i Komisionit Europian i ka dedikuar hapësirë të veçantë korrupsionit në Policinë e Shtetit dhe Ligjit të Aministisë që u dekretua në muajin prill në vendin tonë. Sipas këtij raporti, uniformat blu mbeten shumë të ndjeshme ndaj korrupsionit dhe kjo është e dëshmuar nga numri i madh i ankesave në Agjencinë e Mbikëqyrjes Policore. Edhe pse organet legjislative kanë sanksionuar dhe shtrënguar Kodin Penal, prej 2016-tës, duket se ky problem vijon të jetë prezent në vendin tonë.
“Policia e Shtetit mbetet shumë e ndjeshme ndaj korrupsionit siç dëshmohet nga një numër I madh ankesash në Agjencinë e Mbikëqyrjes Policore, pavarësisht se janë bërë shumë përpjekje kundër korrupsionit”, thuhej në raport që më tej shpjegonte këtë organ të rëndësishëm për mbikëqyrjen dhe hetimin e uniformave blu.
“Në vitin 2023, AMP ka pranuar 1 522 ankesa drejtpërdrejt dhe 4 203 ankesa përmes linjës telefonike të dedikuar. Agjencia rekomandoi nisjen e hetimeve disiplinore për 95 punonjës, për 15 prej tyre për shkelje të rënda. Gjatë të njëjtit vit, Agjencia referoi në ndjekje penale 342 punonjës të zbatimit të ligjit, kryesisht për “shpërdorim detyre” dhe “korrupsion pasiv”.
Krimi i Organizuar vijon të jetë shqetësues në Shqipëri dhe kjo edhe prej bashkëpunimit që kriminelët kanë me efektivë të policisë së Shtetit.
“Për të garantuar integritetin e personelit të policisë, në vitin 2023, 72 persona iu nënshtruan vlerësimit periodik dhe kalimtar me vendime që variojnë nga konfirmimi deri te largimi nga postet. Që nga dhjetori 2023, të gjithë oficerët e policisë ishin të detyruar me urdhër të qeverisë të deklaronin nëse përdornin aplikacione specifike të koduara të komunikimit. Mesazhet e koduara nëpërmjet këtyre aplikacioneve kishin treguar një nivel të lartë të infiltrimit kriminal dhe korrupsionit në radhët e policisë. Pas urdhrit të datës 17 qershor 2024 për procesin e verifikimit të integritetit në polici, punonjësit e policisë u detyruan të dorëzonin formularët e plotësuar të vetëdeklarimit brenda datës 30 qershor”.
Ndërkaq, në të njëjtën peshore është vendosur edhe Ligji për Aministinë që u dekretua në prill të këtij viti. Një vendim që mori shumë reagime, veçanërisht nga Opozita duke theksuar se i shkonte për shtat mazhorancës. Raporti cek pikërisht këtë pjesë sensitive, duke treguar se nga ky ligj përfituan afro 400 të burgosur, shumë prej tyre në nivel drejtuesish, nënkryetarë bashkie dhe sekretarë të përgjitshëm. Europianët e shohin si problem këtë dekret të presidentit Begaj teksa shkruajnë:
“Numri i personave të hetuar, të ndjekur penalisht dhe të dënuar për vepra korrupsioni është rritur gjatë tre viteve të fundit, ndërsa një ligj i fundit për amnisti ngre shqetësime. Në vitin 2022, 186 persona u dënuan për korrupsion në sektorin publik dhe 7 për korrupsion të nivelit të lartë, ndërsa 298 raste të reja u dërguan në gjykatë për sektorin public. 18 persona u dënuan për korrupsion në sistemin gjyqësor, duke përfshirë ish-Prokurorin e Përgjithshëm. Në prill 2024, Shqipëria miratoi një ligj që u jep amnisti rreth 700 të burgosurve dhe ul dënimin e mbi 400 individëve, duke përfshirë zyrtarë të nivelit të mesëm, nënkryetarë bashkie dhe sekretarë të përgjithshëm të dënuar për korrupsion. Prej tyre, 40 persona të dënuar nga Gjykatat Speciale për vepra penale Kundër Korrupsionit dhe Krimit të Organizuar, për ushtrim të ndikimit të paligjshëm ndaj funksionarëve publikë ishin në objektin e përjashtimit nga vuajtja e dënimit”.
