Kostoja e jetesës mbetet një nga indikatorët më të rëndësishëm për të matur nivelin real të mirëqenies dhe mundësitë ekonomike të qytetarëve në vende të ndryshme të botës. Ky tregues pasqyron shpenzimet bazë për ushqim, strehim, transport, shërbime dhe nevoja të tjera të përditshme, duke nxjerrë në pah standardin e jetesës në secilin shtet.
Sipas Indeksit të Kostos së Jetesës për vitin 2026 nga Numbeo, Shqipëria renditet në vendin e 71 nga 155 shtete të marra në shqyrtim në rang global. Me një vlerësim prej 45.8 pikësh, vendi ynë klasifikohet si një shtet me kosto mesatare jetese. Megjithatë, në krahasim me vendet e rajonit, Shqipëria rezulton të jetë vendi më i shtrenjtë për të jetuar.
Menjëherë pas Shqipërisë renditen Mali i Zi dhe Serbia, të cilat pozicionohen respektivisht në vendin e 76 dhe 77, me një kosto jetese të përafërt. Ndërkohë, Bosnje & Hercegovina vlerësohet me 37.8 pikë dhe renditet në vendin e 95, duke reflektuar një kosto dukshëm më të ulët jetese.
Maqedonia e Veriut dhe Kosova paraqiten me kostot më të ulëta në rajon, duke u renditur përkatësisht në vendin e 108 dhe 129. Nga këto të dhëna rezulton se Kosova është vendi më i lirë për të jetuar në Ballkanin Perëndimor.
Në nivel global, vendi me koston më të lartë të jetesës janë Ishujt Bermuda, të cilët kryesojnë renditjen me 135.8 pikë. Në Evropë, vendi më i shtrenjtë për të jetuar mbetet Zvicra. Po ashtu, Singapori dhe Islanda renditen ndër 10 vendet e para me indeksin më të lartë të kostos së jetesës në botë.
Në anën tjetër të renditjes, vendi me indeksin më të ulët të kostos së jetesës është Libia. Gjithashtu, shtete si India, Pakistani dhe Egjipti paraqiten me nivele shumë të ulëta të shpenzimeve të jetesës, duke reflektuar kosto minimale për nevojat bazë.
Këto të dhëna ofrojnë një pasqyrë të qartë mbi dallimet ekonomike mes vendeve dhe theksojnë sfidat me të cilat përballen qytetarët shqiptarë, veçanërisht në raport me të ardhurat dhe fuqinë blerëse në rajon.
Marrë nga Scantv.al
