4 vite pas pushtimit të Ukrainës nga Rusia, konflikti vazhdon të jetë më i madhi në Europë që nga Lufta e Dytë Botërore, duke shkaktuar vuajtje të jashtëzakonshme për civilët dhe humbje të mëdha për ushtarët, ndërsa rishkruan rendin e sigurisë pas Luftës së Ftohtë.
Ndërsa luftimet hyjnë në vitin e 5-të, shenjat për një përfundim të afërt mungojnë.
Përpjekjet diplomatike, duke përfshirë ndërmjetësimin e SHBA-ve për bisedime midis delegacioneve të Moskës dhe Kievit, kanë ngecur për shkak të dallimeve të thella mbi të ardhmen e territoreve të pushtuara dhe sigurinë e pasluftës për Ukrainën.
Humbjet njerëzore dhe shifrat tronditëse
1.8 milionë është shifra e llogaritur e ushtarëve të vrarë, plagosur ose të zhdukur nga të dyja palët, sipas raportit të fundit të Center for Strategic and International Studies (CSIS).
Rusia ka pësuar rreth 1.2 milionë viktima ushtarake, përfshirë deri në 325 mijë të vdekur. Kjo është humbja më e madhe e trupave të një fuqie të madhe që nga Lufta e Dytë Botërore.
Ukraina ka pasur midis 500 mijë dhe 600 mijë viktima ushtarake, me deri në 140 mijë të vdekur në total. Presidenti Volodymyr Zelensky ka deklaruar se 55 mijë ushtarë ukrainas kanë humbur jetën, ndërsa shumë të tjerë janë të zhdukur.
14 999, numri i viktimave civile në Ukrainë që nga pushtimi i plotë i Rusisë, sipas Misionit të Monitorimit të të Drejtave të Njeriut të OKB-së, shifër që konsiderohet e nënvlerësuar.
Më shumë se 40 600 civilë janë plagosur gjatë kësaj periudhe. Lufta ka marrë jetën e të paktën 763 fëmijëve.
Viti 2025 ishte më vdekjeprurësi për civilët që nga fillimi i pushtimit, me 2 514 të vrarë dhe 12 142 të plagosur, një rritje prej 31% krahasuar me vitin 2024.
Po territori?
19.4%, pjesa e territorit ukrainas që aktualisht kontrollohet nga Rusia. Rusia ka fituar vetëm 0.79% tokë shtesë gjatë vitit të kaluar, duke treguar progres minimal.
13%, ulja e ndihmës ushtarake të huaj për Ukrainën gjatë vitit të kaluar krahasuar me mesataren 2022-2024. Ndërkohë, ndihma nga vendet europiane është rritur për të kompensuar mungesën e dërgesave amerikane.
5.9 milionë është numri i civilëve ukrainas që janë larguar nga vendi, nga të cilët 5.3 milionë kanë gjetur strehim në Europë dhe të paktën 300 mijë në Kanada. Përveç tyre, rreth 3.7 milionë janë zhvendosur brenda vendit.
Në 2 881 raste Rusia ka goditur shërbimet mjekësore që nga pushtimi i plotë, sipas Organizatës Botërore të Shëndetësisë (WHO). Këto përfshijnë sulme ndaj objekteve, automjeteve dhe magazinimit të pajisjeve mjekësore, me një rritje prej 20% gjatë vitit 2025 krahasuar me vitin e mëparshëm.
Në 4 vitet e fundit, konflikti ka treguar një kosto të jashtëzakonshme për Ukrainën dhe ka dëmtuar rëndë jetën e civilëve, duke treguar se përfundimi i kësaj lufte mbetet ende larg.
Marrë nga The Guardian
