Një investigim i thelluar i publikuar këtë javë ka hedhur dritë mbi një skemë komplekse kontrabande, përmes së cilës Rusia po shet në Izrael drithëra të vjedhura nga territoret e pushtuara të Ukrainës.
Sipas të dhënave, fitimet nga ky operacion klandestin po përdoren drejtpërdrejt për të financuar makinën e luftës të Vladimir Putinit. Siç raporton Haaretz, anija e mallrave “Abinsk”, e cila lundron nën flamurin rus, u ankorua së fundmi në portin e Haifës e ngarkuar me grurë me vlerë miliona dollarë.
Ndonëse në dukje një anije normale, qeveria e Kievit kishte paralajmëruar zyrtarisht autoritetet izraelite se ngarkesa ishte vjedhur nga territoret e pushtuara. Megjithatë, pavarësisht alarmit të dhënë, anija u lejua të shkarkonte mallin në tregun vendas.
Hetimi gazetaresk zbulon se ky nuk është një rast i izoluar, por një prirje në rritje. Për të anashkaluar sanksionet ndërkombëtare, Rusia ka zhvilluar një protokoll të sofistikuar maskimi.
Anijet nuk ngarkohen në porte ruse, por përdorin operacionet “anije-me-anije” (STS) në det të hapur, pranë Ngushticës së Kerçit.
Sipas dokumenteve të siguruara nga Haaretz, anijet transportuese fikun transponderët e tyre (sistemin AIS) për t’u bërë të padukshme nga sistemet e gjurmimit ndërsa marrin grurin nga hambarët lundruese apo anijet më të vogla që vijnë direkt nga Krimea e pushtuar.
Pasi përfundon ngarkimi, ato ndezin sërish radiot dhe raportojnë destinacionin drejt Izraelit, duke paraqitur dokumente të rreme sikur gruri e ka origjinën nga Siberia. Një rast tjetër flagrant i dokumentuar nga imazhet satelitore është ai i anijes “St.Olga”.
Në korrik të vitit 2023, kjo anije shkarkoi 27.000 ton grurë në portin e Ashdodit. Investigimi i Haaretz vërtetoi përmes të dhënave të gjurmimit se “St.Olga” kishte marrë ngarkesën në det të hapur nga anija ruse “Matros Pozynich”, e cila ishte fotografuar nga satelitët duke u ngarkuar në terminalin Avlita në Sevastopol të Krimesë.
Ukraina ka shprehur pakënaqësi të thellë për këtë situatë. “Është e papranueshme që Izraeli të lejojë importin e mallrave të vjedhura”- deklaroi qeveria e Kievit, duke theksuar se të paktën 15 milionë ton grurë janë grabitur nga fermat ukrainase që nga fillimi i pushtimit.
Nga ana tjetër, blerësit izraelitë mbrohen duke thënë se është e pamundur të verifikohet origjina e saktë e produktit kur dokumentacioni rus duket i rregullt. Megjithatë, siç vëren Haaretz, regjistrat e brendshëm rusë listojnë mbi 30 dërgesa të tilla me destinacion final Izraelin, duke konfirmuar se tregtarët rusë janë “të kënaqur me sekretin e procesit”.
Deri më tani, Ministria e Jashtme izraelite ka dhënë një përgjigje evazive, duke pohuar vetëm se komunikimet me palën ukrainase po vazhdojnë përmes kanaleve diplomatike. Ndërkohë, një tjetër anije e dyshimtë raportohet se ka mbërritur në Gjirin e Haifës këtë të diel, duke pritur radhën për të shkarkuar “arin e zi” të vjedhur nga fushat e Ukrainës.
Marrë nga Haaretz.com
