Presidenti i SHBA-së, Donald Trump, ka paralajmëruar Iranin se “ora po ecën”, ndërsa negociatat për t’i dhënë fund konfliktit mes palëve kanë hyrë në ngërç.
Deklarata e presidentit amerikan erdhi pas një bisede telefonike me kryeministrin izraelit Benjamin Netanyahu, raportuan mediat izraelite duke cituar zyrën e Netanyahut.
Sipas agjencisë gjysmëzyrtare iraniane Mehr, mungesa e kompromisit nga SHBA-ja mund të çojë në një “bllokim të plotë” të negociatave. Ndërkohë, zëdhënësi i Ministrisë së Jashtme iraniane, Esmail Baghaei, i mbrojti kërkesat e Teheranit duke i cilësuar ato si “të përgjegjshme” dhe “bujare”.
Propozimet iraniane, sipas agjencisë Tasnim, përfshijnë ndalimin e menjëhershëm të luftimeve në të gjitha frontet, fundin e bllokadës detare amerikane ndaj porteve iraniane dhe garanci për moskryerjen e sulmeve të tjera kundër Iranit. Teherani gjithashtu ka kërkuar kompensim për dëmet e luftës dhe njohjen e sovranitetit të tij mbi Ngushticën e Hormuzit.
Nga ana tjetër, agjencia Fars raportoi se SHBA-ja ka paraqitur pesë kushte në përgjigje të ofertës iraniane, mes tyre kufizimin e programit bërthamor në vetëm një central funksional dhe transferimin e rezervave të uraniumit të pasuruar në SHBA.
Marrë nga Associated Press
