Një person i armatosur u vra mbrëmjen e së shtunës pas një shkëmbimi zjarri me agjentët e Shërbimit Sekret amerikan pranë Shtëpisë së Bardhë në Uashington.
I dyshuari është identifikuar si Nasire Best, 21 vjeç, i njohur më parë nga Shërbimi Sekret dhe me histori të dokumentuar të problemeve të shëndetit mendor. Sipas Shërbimit Sekret, pak para orës 18:00 me orën lokale, i riu nxori një armë nga çanta dhe hapi zjarr.
Agjentët iu kundërpërgjigjën menjëherë, duke e plagosur rëndë autorin, i cili më vonë u shpall i vdekur në spital.
Autoritetet konfirmuan gjithashtu se një kalimtar mbeti i plagosur gjatë incidentit, por nuk janë dhënë detaje mbi gjendjen e tij shëndetësore.
Burime të afërta me hetimin thanë për CBS, se Nasire Best kishte tentuar të hynte në Shtëpinë e Bardhë në korrik të vitit 2025 dhe ishte arrestuar pranë saj nga agjentët federalë. Pas arrestimit, ai kishte kaluar një periudhë në një institucion psikiatrik.
Sipas të njëjtave burime, 21-vjeçari jetonte në Uashington prej rreth 18 muajsh dhe përdori një revolver gjatë sulmit.
Gjatë incidentit, Presidenti Donald Trump ndodhej brenda Shtëpisë së Bardhë, por nuk ishte i rrezikuar.
Sulmi me armë vuri në rrezik edhe gazetarët, pasi disa prej tyre po raportonin live nga Shtëpia e Bardhë.
Ata u detyruan të kërkonin strehim gjatë transmetimeve live kur shpërthyen të shtënat me armë.
Në video të shpërndara në rrjetet sociale, gazetari i CBS News, Aaron Navarro, dhe gazetarja e ABC America, Selina Wang, shihen duke u ulur dhe duke vrapuar për tu mbrojtur, ndërsa në sfond dëgjohen të shtëna me armë dhe oficerë sigurie që urdhërojnë njerëzit të largohen nga zona.
Lidhur me sulmin ka reaguar edhe Presidenti Trump.
Me anë të një postimi në Truth Social, Trump falënderoi Shërbimin Sekret dhe forcat e rendit për reagimin e shpejtë dhe profesional ndaj personit të armatosur, për të cilin tha se kishte një histori dhune dhe një “obsesion të mundshëm” me Shtëpinë e Bardhë.
Marrë nga CBS News
