Pesë ligat kryesore të futbollit europian, të njohura si “Big Five”, vazhdojnë të konsolidojnë dominimin e tyre financiar në futbollin botëror. Vlera e kombinuar e tregut të Premier League, LaLiga, Serie A, Bundesliga dhe Ligue 1 arrin në rreth 32 miliardë euro, me kampionatin anglez që mban një avantazh të ndjeshëm ndaj rivalëve.
Premier League përfaqëson thuajse 40% të kësaj vlere, me një vlerësim tregu prej 12.56 miliardë eurosh dhe të ardhura vjetore që kalojnë 8 miliardë euro.
Pas Anglisë renditet LaLiga me një vlerë të përllogaritur prej 5.45 miliardë eurosh. Më pas vijnë Serie A me 5.36 miliardë, Bundesliga me 4.8 miliardë dhe Ligue 1 me 3.8 miliardë euro.
Në aspektin e të ardhurave vjetore, Premier League kryeson me rreth 8.1 miliardë euro, përpara LaLigës me 4.1 miliardë, Bundesligës me 4 miliardë, Serie A me 3.1 miliardë dhe Ligue 1 me 2.3 miliardë euro.
Anglia dominon edhe në të drejtat televizive
Diferenca mes Premier League-s dhe kampionateve të tjera është veçanërisht e madhe në aspektin e të drejtave televizive. Klubet angleze arkëtojnë më shumë se 3.5 miliardë euro në sezon vetëm nga të drejtat e transmetimit, të nxitura kryesisht nga shtrirja globale e Premier League-s.
Në Spanjë, Real Madridi dhe Barcelona mbeten motorët kryesorë ekonomikë të LaLiga-s, veçanërisht në aspektin komercial. Në Francë, Paris Saint-Germain është klubi që gjeneron pjesën më të madhe të të ardhurave.
Ekspertët vlerësojnë se ligat europiane po përpiqen gjithnjë e më shumë të diversifikojnë burimet e të ardhurave. Të drejtat televizive mbeten thelbësore, por sponsorët dhe të ardhurat nga ndeshjet po marrin një peshë gjithnjë e më të madhe.
Italia dhe Franca përballen me vështirësi
Ndërsa Premier League vijon rritjen, disa nga rivalët kontinentalë po përballen me probleme. Serie A ka regjistruar një rënie prej rreth 3% në ciklin e fundit të të drejtave televizive vendase, ndërsa Ligue 1 ka pësuar një zhvlerësim prej rreth 20%.
Franca po eksperimenton edhe me transmetimin direkt te konsumatori, në përpjekje për të kompensuar humbjet dhe për të krijuar burime të reja të ardhurash.
Në të kundërt, tregu i sponsorizimeve po shënon rritje. Sipas një studimi të European Sponsorship Association dhe Ampere Analysis, sponsorizimet kanë gjeneruar një vlerë rekord prej 5.4 miliardë dollarësh për “Big Five”. Rreth 76% e kësaj shume vjen nga kompani ndërkombëtare, me investitorë nga SHBA-ja, Lindja e Mesme dhe Azia.
Premier League kryeson edhe merkaton
Dominimi financiar i kampionatit anglez reflektohet edhe në tregun e transferimeve. Deri tani, klubet e Premier League-s kanë shpenzuar rreth 2.3 miliardë euro, shumë më tepër se Italia me 815.6 milionë euro, Spanja me 605 milionë, Gjermania me 555 milionë dhe Franca me 382.8 milionë euro.
Në total, klubet e “Big Five” kanë shpenzuar rreth 6.5 miliardë euro në merkato
Shtatë nga dhjetë klubet që kanë investuar më shumë deri tani janë angleze. Chelsea kryeson me 389 milionë euro, i ndjekur nga Tottenham me 267 milionë dhe Real Madridi me 225 milionë. Më pas renditen Manchester City me 175 milionë, Arsenali me 168 milionë, Newcastle me 161.2 milionë dhe Juventusi me 137.2 milionë euro.
Barcelona pritet të arrijë rreth 150 milionë euro shpenzime pasi të zyrtarizojë transferimin e Rodrit.
Shifrat tregojnë qartë se hendeku financiar mes Premier League-s dhe pjesës tjetër të Europës po zgjerohet. Anglia vazhdon të fitojë terren në të drejtat televizive, sponsorizime, të ardhurat nga stadiumet dhe merkato, duke e bërë kampionatin anglez forcën kryesore ekonomike të futbollit europian.
Marrë nga Marca.com
