Presidenti i Serbisë, Aleksandar Vuçiç, ka paralajmëruar dërgimin e një letre zyrtare drejtuar Sekretarit të Përgjithshëm të NATO-s, Mark Rutte, përmes së cilës do të kërkojë zyrtarisht ndalimin e hapjes për qarkullim të urës mbi lumin Ibër në Mitrovicë.
Gjatë fjalës së tij nga Beogradi, Vuçiç hodhi akuza të drejtpërdrejta ndaj komandantit të KFOR-it, Gjeneralit Özkan Ulutaş, ndërsa shprehu zhgënjimin e tij për këtë zhvillim. Ai pretendoi se ky veprim tregon nervozizëm tek partnerët ndërkombëtarë për shkak të qëndrimit refuzues të Serbisë ndaj pavarësisë së Kosovës.
Reagimi i Beogradit zyrtar vjen vetëm një ditë pasi Bashkimi Evropian konfirmoi se tashmë janë plotësuar të gjitha kushtet teknike dhe politike për hapjen e urës kryesore të Mitrovicës edhe për qarkullimin e automjeteve.
“Këtë po e bën turku, komandanti i KFOR-it. Sot do t’i shkruaj Mark Rutes dhe shpresoj që t’i përgjigjet letrës sime dhe ta pranojë kërkesën time që kjo të mos bëhet. Për mua, ky është një turp i madh dhe një zhgënjim. Kjo na tregon se nervozizmi ka hyrë në radhët e tyre, nuk dinë se si ta detyrojnë Serbinë ta pranojë Kosovën e pavarur. Ne do të shohim se si t’i ndihmojmë popullit tonë. Ngadalë, gjërat po ndryshojnë në botë, por jo aq shpejt sa kemi pritur. Çdo ditë një popull keqtrajtohet, dëbohet nga vatrat e tij. Do të shohim se cila do të jetë përgjigjja e tyre”, ka thënë Vuçiç në Beograd.
Marrë nga Dosja.al
