Sipas INSTAT, në fund të vitit 2025 numri i shtetasve të huaj me leje qëndrimi në Shqipëri është rritur ndjeshëm, me rreth 47% më shumë krahasuar me vitin 2024.
Shtetasit evropianë përbëjnë grupin më të madh të të huajve me leje qëndrimi. Në vitin 2025 ishin rreth 17 mijë persona, ose rreth 53% e totalit.
INSTAT thekson se numri i shtetasve nga Azia të ardhur në vendin tonë arrin në 10 mijë, duke shënuar një rritje prej 118% brenda një viti. Ndërsa shtetasit nga Amerika, Afrika dhe Oqeania u rritën me 73% krahasuar me vitin 2024.
Arsyeja kryesore pse të huajt zgjedhin të marrin leje qëndrimi në Shqipëri është punësimi. Viti 2025 ka regjistruar numrin më të lartë të lejeve të qëndrimit në Shqipëri, me një rritje prej 44% në krahasim me vitin 2024.
Aplikime të shtuara janë regjistruar edhe nga shtetasit indianë dhe filipinas. Kjo lidhet drejtpërdrejt me nevojën e bizneseve shqiptare për punonjës të huaj, kryesisht në sektorët e shërbimeve, akomodimit dhe punëve shtëpiake.
Nga ana tjetër, INSTAT thekson se krahas të huajve me leje qëndrimi të rregullt ka edhe raste të shtetasve të huaj me qëndrim të parregullt në vendin tonë. Gjatë vitit të kaluar u regjistruan rreth 1900 shtetas të huaj pa leje qëndrimi në Shqipëri, 400 persona më shumë se në vitin 2024.
Marrë nga Newsbomb.al
