Gjykata Supreme e SHBA-së vendosi të hënën në favor të Presidentit Donald Trump lidhur me urdhrin e tij ekzekutiv për forcimin e integritetit zgjedhor në lidhje me fletët e votimit me postë, duke thënë se shtetet që e kanë paditur administratën e bënë këtë në mënyrë të papërshtatshme.
Vendimi i sotëm nuk përbën vendimin përfundimtar për çështjen, por vjen në një kohë kur disa shtete kanë nisur të dërgojnë fletët e votimit te zgjedhësit në fillim të shtatorit. Vendimi u publikua si një urdhër i panënshkruar, ndërsa tre gjyqtarët liberalë votuan kundër.
Në mars, Presidenti Trump nënshkroi urdhrin ekzekutiv në fjalë, i cili udhëzon Departamentin e Sigurisë Kombëtare të verifikojë shtetësinë në çdo shtet. Urdhri gjithashtu udhëzoi Shërbimin Postar të SHBA-së (USPS) të nisë procedurat për hartimin e rregullave që do të siguronin se vetëm zgjedhësit e verifikuar dhe të ligjshëm do të merrnin fletë votimi.
Javën e kaluar, USPS publikoi një sërë kërkesash në përgatitje për hyrjen në fuqi të urdhrit.
“Presidenti Trump po ndërmerr veprime vendimtare për të parandaluar votimin e shtetasve joamerikanë në zgjedhjet federale dhe për të mbrojtur sigurinë e fletëve të votimit me postë dhe atyre në mungesë”, thuhej në një fletë informuese që përmbledhte masat e parashikuara në urdhrin ekzekutiv.
Gjykata Supreme e bëri të qartë se nuk po vendoste mbi themelin e urdhrit të Trumpit, por kundërshtoi mënyrën procedurale përmes së cilës shtetet e kishin kundërshtuar atë.
“Për këtë çështje, koha do ta tregojë”, thuhej në vendim, i cili shtonte se vetë urdhri nuk u kishte shkaktuar dëm shteteve që paditën Trumpin dhe se Gjykata Federale e Massachusettsit nuk kishte juridiksion për ta penguar hyrjen e tij në fuqi, pasi urdhri në vetvete nuk u kishte shkaktuar atyre dëm në këtë fazë.
Marrë nga Breitbart.com
