Gjykata e Hagës ka reaguar ndaj pretendimeve të ngritura në Serbi për trajtimin mjekësor të ish-gjeneralit serb Ratko Mladiç, duke deklaruar se kujdesi i ofruar ndaj tij gjatë qëndrimit në paraburgim ka tejkaluar standardet minimale të kërkuara nga normat ndërkombëtare.
Mekanizmi i Hagës bëri të ditur se aktualisht nuk mund të japë detaje mbi rrethanat e vdekjes së tij, pasi hetimi zyrtar është ende në zhvillim.
Sipas institucionit, ky është një procedurë standarde që zhvillohet sa herë që një person i paraburgosur vdes në njësinë e paraburgimit të Kombeve të Bashkuara. Rezultatet e hetimit do t’i dorëzohen presidentes sapo të jetë e mundur.
Për momentin, Mekanizmi thekson se informacionet mbi rrethanat e vdekjes mbeten konfidenciale dhe nuk mund të bëhen publike përpara përfundimit të procesit hetimor.
Reagimi i Hagës vjen pasi në Serbi u ngritën pikëpyetje nga disa përfaqësues politikë lidhur me shkakun e vdekjes së ish-komandantit të forcave serbe të Bosnjës.
Agjencia serbe e lajmeve “Tanjug” raportoi se kishte marrë përgjigje nga shërbimi për shtyp i Hagës, ku thuhej se deri në përfundimin e hetimit, detajet e vdekjes së Mladiçit konsiderohen të rezervuara.
Ndërkohë, autoritetet serbe kanë njoftuar se synojnë t’i organizojnë atij një funeral me nderime të plota shtetërore dhe ushtarake pas kthimit të trupit në Serbi.
Kreu i Mekanizmit Ndërkombëtar vlerësoi trajtimin që i ishte ofruar Mladiçit në spitalin e paraburgimit, duke përfshirë kujdesin mjekësor dhe ndihmën për aktivitetet e përditshme.
Sipas tij, kujdesi i garantuar ndaj ish-gjeneralit serb “tejkaloi ndjeshëm minimumin e kërkuar nga standardet ndërkombëtare”.
Ratko Mladiç u dënua për rolin e tij në luftën e Bosnjës, përfshirë masakrën e Srebrenicës në vitin 1995, ku mbi 8 mijë burra dhe djem boshnjakë u vranë në një nga krimet më të rënda në Evropë pas Luftës së Dytë Botërore.
Marrë nga Radio Evropa e Lirë
