Turizmi i të huajve në Shqipëri vijon të jetë fort i përqendruar në dy qarqe. Nga 5.230.937 netqëndrime të vizitorëve jorezidentë të regjistruara në strukturat akomoduese gjatë vitit 2024, Tirana dhe Vlora morën së bashku 3.791.561, ose rreth 72,5% të totalit kombëtar.
Vetëm Tirana regjistroi 2.451.716 netëqëndrime nga vizitorët jorezidentë, duke përfaqësuar 46,9% të totalit të vendit. Vlora renditet e dyta me 1.339.845 netqëndrime, ose rreth 25,6%. Pra, pothuajse tre të katërtat e netëve të kaluara nga vizitorët e huaj në strukturat akomoduese të Shqipërisë janë përqendruar në këto dy qarqe. INSTAT konfirmon se Tirana kishte pjesën më të madhe të netëqëndrimeve të jorezidentëve.
Hendeku me qarqet e tjera është i konsiderueshëm. Durrësi, destinacioni i tretë sipas këtij treguesi, regjistroi 492.327 netqëndrime nga të huajt, ndërsa Lezha 325.956 dhe Shkodra 292.375. Tirana kishte kështu afro pesë herë më shumë netqëndrime të vizitorëve jorezidentë sesa Durrësi.
Përqendrimi i kërkesës turistike shoqërohet edhe me zgjerim të ofertës, veçanërisht në Vlorë. Sipas INSTAT-it, numri i strukturave akomoduese në Shqipëri u rrit me 32,8% në vitin 2024 krahasuar me vitin 2022, ndërsa Vlora shënoi rritjen më të madhe mes qarqeve, me 57,1%. Në vitin 2024, strukturat akomoduese në të gjithë vendin kishin në dispozicion rreth 59 mijë dhoma dhe 131 mijë shtretër.
Në total, netqëndrimet në të gjitha format e akomodimit turistik arritën rreth 7 milionë në vitin 2024, me një rritje prej 23,9% krahasuar me 2022. Ndërsa Tirana dominon te turistët e huaj, Vlora kryeson për vizitorët rezidentë: 34,6% e netqëndrimeve të tyre u regjistruan në këtë qark.
Të dhënat tregojnë se rritja e turizmit nuk është shpërndarë në mënyrë të njëtrajtshme në territor. Tirana, si qendër kryesore hyrëse dhe urbane, dhe Vlora, si një prej destinacioneve kryesore bregdetare, marrin së bashku pjesën dërrmuese të netëqëndrimeve të vizitorëve të huaj, ndërsa pjesa tjetër e qarqeve ndajnë më pak se 28% të totalit.
Marrë nga Ekofin.al
