Qarkullimi në Tunelin e Krrabës do të kufizohet gjatë orëve të natës për një periudhë maksimale prej 20 ditësh, për shkak të punimeve të planifikuara për pastrimin e mureve dhe pajisjeve të tunelit.
Autoriteti Rrugor Shqiptar njoftoi se punimet do të nisin të mërkurën, më 7 tetor, dhe do të zhvillohen çdo natë nga ora 21:00 deri në 06:00 të mëngjesit.
Gjatë këtij orari, tuneli do të funksionojë vetëm me një tub, ku qarkullimi i automjeteve do të zhvillohet në të dyja drejtimet.
Sipas ARRSH-së, punimet do të nisin në tubin e drejtimit Elbasan–Tiranë, ndërsa tubi Tiranë–Elbasan do të përdoret për qarkullimin e mjeteve në të dyja kahjet.
Gjatë ditës, nga ora 06:00 deri në 21:00, qarkullimi do të vijojë normalisht, me të dy tubat në funksion.
Autoriteti bëri të ditur se gjatë orarit të kufizimeve do të jetë e pranishme edhe Policia Rrugore, me qëllim garantimin e sigurisë dhe menaxhimin e trafikut.
ARRSH u kërkoi drejtuesve të mjeteve të tregojnë kujdes gjatë kalimit në tunel dhe të respektojnë sinjalistikën rrugore dhe udhëzimet e Policisë Rrugore gjatë gjithë periudhës së punimeve.
Marrë nga Monitor
