Qeveria e Kosovës ka themeluar grupin punues për strategjinë shtetërore lidhur me procedurën e Apelit në rastin e ish-katër krerëve të Ushtrisë Çlirimtare të Kosovës pranë Dhomave të Specializuara.
Propozim-vendimi është miratuar me unanimitet të plotë nga kabineti qeveritar, në mbledhjen e kësaj të mërkure.
Propozimin për themelimin e grupit punues për hartimin, bashkërendimin dhe harmonizimin e strategjisë shtetërore, e paraqiti para anëtarëve të kabinetit qeveritar kryeministri Albin Kurti.
“Arsyetimi i shkallës së parë i Dhomave të Specializuara të Kosovës, konsiderojmë se është i padrejtë, andaj synojmë që të bëhet korrigjimi i tij në shkallën e Apelit”, është shprehur ai.
Kryeministri Albin Kurti ka theksuar se për këtë nevojitet një “strategji shtetërore” dhe një “organizim që i tejkalon dallimet partiake”. Grupi-punues do të kryesohet nga ministri i Jashtëm i Kosovës, Glauk Konjufca.
Sipas kryeministrit, pjesë e grupit punues do të jenë edhe përfaqësues nga Kuvendi i Kosovës.
“Me këtë vendim po e konkretizojmë zotimin tonë, që me mjetet që i kemi në dispozicion, të angazhohemi për drejtësi dhe për mbrojtjen e të vërtetës historike të luftës tonë çlirimtare”, është shprehur më tej kryeministri Albin Kurti.
Dhomat e Specializuara të Hagës kanë dënuar me 81 vite burg në total katër ish-drejtuesit e Ushtrisë Çlirimtare të Kosovës, ushtrisë që u përballë me regjimin kriminal serb dhe i solli lirinë gjithë popullit shqiptar, në seancën e datës 16 Shtator 2026.
Marrë nga Kosovapress.com
