Një përplasje e ashpër ka shpërthyer mes aleatëve të afërt të presidentit Donald Trump, pasi Alina Habba, ish-avokatja e tij personale, e cila shërbeu si Prokurore e lartë federale në Nju Xhersi, akuzon ish-drejtorin e Inteligjencës dhe diplomatin Richard Grenell se nuk ka depozituar miliona dollarë të dhuruara për Qendrën Kennedy nga bashkëshorti i saj, një miliarder turk.
Habba, 42 vjeçe, u martua muajin e kaluar me Turhan Mildon, 29 vjeç, dhe i tha Trump-it të premten në Zyrën Ovale se Grenell nuk kishte depozituar 5,6 milionë dollarë nga Mildon, të destinuara për qendrën. Grenell e drejtoi këtë institucion deri në muajin mars, në cilësinë e drejtorit ekzekutiv.
Presidenti, i cili ka synuar të rinovojë këtë institucion të arteve skenike dhe t’i ndryshojë emrin për të përfshirë edhe emrin e tij, ia ka referuar akuzat këshilltarit ligjor të Shtëpisë së Bardhë, Will Scharf, për hetime të mëtejshme.
Pretendimet e Habba-s u raportuan fillimisht nga Axios. Përshkrimi i takimit në Zyrën Ovale nga kjo media u konfirmua për The Post nga një zyrtar i Shtëpisë së Bardhë, i cili nuk dha vlerësimin e tij për vërtetësinë e akuzave, si dhe nga një person tjetër pranë administratës, i cili beson se pretendimet e Habba-s janë të vërteta.
Një zyrtar i administratës i tha The Post se Grenell dyshohet se e kishte bindur Mildon-in, në fillim të vitit 2025, të kryente një transfertë bankare prej 17,6 milionë dollarësh si pjesë e një marrëveshjeje biznesi ku të dy ishin partnerë. Nga kjo shumë, 5,6 milionë dollarë duhej të shkonin për Qendrën Kennedy. Zyrtari nuk e dinte se cila kompani dyshohet se i kishte marrë fondet.
Megjithatë, tre burime të tjera, të cilat janë kritike ndaj Grenell-it për arsye të tjera, i thanë The Post se dyshojnë në vërtetësinë e pretendimeve të Habba-s.
Një zyrtar i Shtëpisë së Bardhë tha se ishte “shumë skeptik se kjo është e vërtetë”. Një tjetër zyrtar i administratës tha se e konsideron Grenell-in “të korruptuar”, por se drejtuesit aktualë të Qendrës Kennedy nuk kanë prova për të vërtetuar historinë e treguar nga Habba. Një person pranë Shtëpisë së Bardhë e përshkroi Grenell-in si “vetëshkatërrues”, por jo “aq budalla”.
“Ajo duhet ta besojë këtë, sepse është një çështje vërtet serioze”, tha një zyrtar i Shtëpisë së Bardhë. “Zyra e Scharf-it do të shkojë deri në fund të çështjes.”
Një zyrtar i administratës tha se avokatët e bashkëshortit të Habba-s i kanë dorëzuar dokumentacion zyrës së këshilltarit ligjor të Shtëpisë së Bardhë.
Grenell, i cili shërben si i dërguari i posaçëm i Trump-it për misione të veçanta, mohoi çdo shkelje.
“Absurde. Nuk i kam kërkuar kurrë askujt të dërgojë as edhe një cent diku tjetër, duke pretenduar se ishte për Qendrën Kennedy, dhe nuk kam marrë kurrë asnjë pagesë prej tij”, tha Grenell.
“Le të japë prova për atë që po thotë, në vend që të bëjë këto akuza absurde.”
Axios citoi një zyrtar të administratës të thoshte se vitin e kaluar, punonjësit e Qendrës Kennedy ishin përpjekur të gjenin një kontribut prej 6 milionë dollarësh nga Mildon, por nuk kishin arritur ta identifikonin atë. Megjithatë, një ish-punonjës i qendrës, i identifikuar me emër, i cili merrej me donacionet, tha se në regjistrat e tij figuronin vetëm 270 mijë dollarë të premtuara, shumë që më vonë ishte paguar.
Ndonëse dikur kishin marrëdhënie miqësore, arsyeja e saktë që çoi në prishjen e marrëdhënieve mes Grenell-it dhe Habba-s mbetet e paqartë.
Grenell kishte shërbyer më parë si përfaqësues i Trump-it te presidenti i atëhershëm i Venezuelës, Nicolás Maduro, të cilin forcat amerikane e kapën më 3 janar, pas dështimit të përpjekjeve diplomatike. Mildon ka interesa biznesi në Venezuelë, ku operon fabrika çimentoje në pronësi të shtetit.
Pas largimit të Maduros nga pushteti, presidentja e përkohshme Delcy Rodríguez anuloi në qershor kontratën e Mildon-it për administrimin e këtyre fabrikave. The New York Times raportoi të hënën se Rodríguez ndryshoi qëndrim dhe pezulloi vendimin për ndërprerjen e kontratës së Mildon-it, pasi mësoi për marrëdhënien e tij me Habba-n.
Marrë nga New York Post
