Egnatia barazoi 1-1 me Midtjyllandin në “Arena Egnatia”, në ndeshjen e vlefshme për fazën e ligës së Conference League, duke marrë një pikë të rëndësishme përballë një kundërshtari që vinte në këtë sfidë pas 14 ndeshjesh radhazi pa humbje në të gjitha kompeticionet.
Skuadra rrogozhiase kaloi në avantazh në minutën e 26-të, kur Ildi Gruda dërgoi topin në rrjetë me kokë, pas një krosimi të saktë nga Altin Kryeziu. Megjithatë, reagimi i danezëve ishte i shpejtë. Vetëm pak minuta më vonë, Gue-Sung Cho barazoi shifrat, gjithashtu me kokë, pas asistit të Rasmus Kristensen.
Midtjyllandi mendoi se kishte përmbysur rezultatin pak çaste më pas, por goli i Cho u anulua nga VAR-i për pozicion jashtë loje. Kjo i dha mundësi Egnatias ta mbyllte pjesën e parë në barazim.
Në fraksionin e dytë, trajneri i miqve, Mike Tullberg, kreu katër zëvendësime të hershme për të kërkuar golin e fitores. Megjithatë, mbrojtja e Egnatias rezistoi mirë dhe rastet e rrezikshme ishin të pakta. Mundësia më e mirë e danezëve erdhi nga një goditje këndi, por tentativa me kokë e Mads Bech Sørensen u ndal nga prapavija vendase.
Në fund, rezultati mbeti 1-1, ndërsa Eneo Bitri u vlerësua si lojtari më i mirë i ndeshjes.
Marrë nga Syri.net
