Qeveria po shqyrton disa masa për protestuesit që identifikohen si autorë të akteve të dhunës gjatë tubimeve të zhvilluara ditët e fundit. Mes propozimeve që po diskutohen nga mazhoranca është edhe përfshirja e tyre në një listë të veçantë në sistemin TIMS, me synimin për t’u kufizuar lëvizjen drejt vendeve të Bashkimit Evropian.
Mediet raportojnë se kjo është një nga alternativat që po shqyrtohen në kuadër të paketës së sanksioneve të paralajmëruar sot nga kryeministri Edi Rama. Megjithatë, deri më tani nuk bëhet fjalë për një masë të miratuar zyrtarisht.
Më herët gjatë ditës, kryeministri paralajmëroi masa ndaj personave që përfshihen në akte dhune gjatë protestave, duke përmendur edhe përgjegjësinë e prindërve për dëmet që mund të shkaktojnë fëmijët e tyre të mitur.
I pari i qeverisë deklaroi gjithashtu se studentët që ushtrojnë dhunë mund të humbasin përfitime nga shteti, përfshirë bursat, arsimin falas dhe mbështetjen financiare. Paralajmërime pati edhe për mësuesit që, sipas tij, nxisin nxënësit të përfshihen në akte të tilla, të cilët mund të përballen me masa deri në largimin nga puna.
Propozimi për listën në TIMS mbetet një nga opsionet e diskutuara, ndërsa ende nuk janë bërë publike detajet përfundimtare të paketës dhe mënyra se si do të zbatoheshin masat e paralajmëruara.
Marrë nga Newsbomb.al
