Një numër rekord pickimesh nga akrepat është raportuar në qytetet e Brazilit, si pasojë e urbanizimit të shpejtë dhe përkeqësimit të kushteve klimatike. Sipas një studimi të publikuar në revistën “Frontiers in Public Health”, mbi 1.1 milionë raste pickimesh janë regjistruar nga viti 2014 deri në vitin 2023 — një rritje prej 250 për qind në një dekadë.
Studiuesit fajësojnë rritjen e lagjeve të dendura dhe të paplanifikuara urbane, si favelat, për krijimin e mjediseve të përshtatshme për akrepat. Kanale, rrënoja ndërtimi, mbeturina dhe prania e buburrecave po sigurojnë strehim, ngrohtësi dhe ushqim të bollshëm për ta. Urbanizimi, sipas tyre, ka transformuar ekosistemet natyrore dhe ka krijuar hapësira të reja ku akrepat mund të shumohen me shpejtësi.
“Qytetet ofrojnë pa dashje gjithçka që u nevojitet akrepave”, ka thënë Manuela Berto Pucca, profesoreshë në Universitetin Shtetëror të Sao Paulos. Ajo theksoi se kanalizimet janë veçanërisht tërheqëse për ta për shkak të ngrohtësisë, mungesës së grabitqarëve dhe ushqimit të mjaftueshëm.
Disa lloje akrepash mund të mbijetojnë deri në 400 ditë pa ushqim dhe shumohen edhe pa çiftëzim, çka i bën shumë të vështirë për t’u zhdukur.
Sipas të dhënave paraprake për vitin 2024, akrepat janë përgjegjës për afro 200 mijë pickime dhe 133 vdekje. Studiuesit parashikojnë se nga viti 2025 deri më 2033 mund të ndodhin rreth 2 milionë raste të reja. Ata paralajmërojnë se numri real mund të jetë edhe më i lartë, pasi shumë njerëz nuk raportojnë pickimet dhe vetë-mjekohen në shtëpi.
Megjithëse vetëm 0.1 për qind e rasteve rezultojnë fatale, fëmijët dhe të moshuarit janë më të rrezikuar. Simptomat përfshijnë dhimbje, ënjtje, ndjesi djegieje, të përziera dhe shqetësim të përgjithshëm për disa ditë.
“Kam punuar në vende ku pickimet nga akrepat janë një frikë e përditshme”, ka thënë Pucca, duke shtuar se në të ardhmen kjo dukuri do të përkeqësohet, veçanërisht në zonat e varfra dhe të mbipopulluara.
Marrë nga The Guardian
