Një 46-vjeçar francez u arrestua në portin e Barit, në Itali, pasi autoritetet zbuluan në furgonin e tij tre raketa Akeron dhe pajisje të tjera të klasifikuara si materiale luftarake.
46-vjeçari kishte mbërritur në portin e Barit me një traget nga Patra e Greqisë. Gjatë kontrollit të automjetit, autoritetet gjetën pesë kontejnerë që përmbanin sisteme armësh antitank, mes tyre tre raketa Akeron, të prodhuara nga kompania franceze MBDA.
Sipas versionit të tij, ai ishte ngarkuar të transportonte pajisjet nga Franca drejt Greqisë, ku kompania Altus LSA do të kryente disa riparime.
Në momentin e ndalimit në Bari, 46-vjeçari ishte duke u kthyer drejt Francës.
Për të mbështetur deklaratën e tij, ai paraqiti dokumente tregtare, komunikime me email, fatura dhe një autorizim të lëshuar në vitin 2025 nga Ministria Franceze e Mbrojtjes për MBDA France, që lidhej me operacione me materiale luftarake.
Megjithatë, autoritetet italiane konstatuan disa probleme me dokumentacionin.
Sipas hetimeve paraprake, shoferi nuk dispononte autorizimet e kërkuara nga pala italiane për transportin e armëve. Gjithashtu, hetuesit vunë re mospërputhje mes vulave dhe datave të dokumenteve të paraqitura.
Në momentin e kontrollit, shoferi kishte paraqitur tre dokumente ndërkombëtare transporti, të cilat, sipas raportit të sekuestrimit, përmbanin një përshkrim të përgjithshëm në frëngjisht dhe nuk kishin listë të detajuar të ngarkesës.
Për këtë arsye, gjyqtari i hetimeve paraprake urdhëroi paraburgimin e 46-vjeçarit, i cili u akuzua për futje të paautorizuar të armëve të luftës.
Marrë nga Tgcom24.it
