Një operacion sekret i CIA-s kundër karteleve të drogës në Meksikë ka ngritur alarmin për përshkallëzim të tensioneve mes Uashingtonit dhe Mexico City-t, pasi raportime ekskluzive të CNN pretendojnë se agjentët amerikanë kanë marrë pjesë drejtpërdrejt në operacione vdekjeprurëse kundër anëtarëve të kartelit Sinaloa.
Sipas burimeve të cituara nga media amerikane, operacioni ndaj Beltran ishte pjesë e një fushate të zgjeruar sekrete të CIA-s në Meksikë, e drejtuar nga njësia elitare “Ground Branch”, me synim shkatërrimin e rrjeteve të karteleve të drogës. Operacionet thuhet se janë intensifikuar pas rikthimit të Donald Trump në Shtëpinë e Bardhë dhe shpalljes së disa karteleve si organizata terroriste të huaja.
Raporti pretendon se operativët amerikanë kanë marrë pjesë jo vetëm në mbledhjen e inteligjencës, por edhe në operacione të drejtpërdrejta vrasëse kundër figurave të kartelit. Strategjia synon eliminimin jo vetëm të liderëve, por edhe të anëtarëve të nivelit të mesëm që mbajnë funksional rrjetin e trafikut të drogës.
Megjithatë, aktivitetet e pretenduara të CIA-s kanë ngritur pikëpyetje serioze ligjore, pasi Kushtetuta meksikane ndalon agjentët e huaj të marrin pjesë në operacione të zbatimit të ligjit pa miratimin e qeverisë federale.
Presidentja e Meksikës, Claudia Sheinbaum, reagoi ashpër ndaj raportimeve dhe deklaroi se “nuk mund të ketë agjentë të institucioneve amerikane që operojnë në territorin meksikan”. Ajo tha se nuk ishte informuar për praninë e operativëve amerikanë në një bastisje ndaj laboratorëve të metamfetaminës në shtetin Chihuahua.
Ndërkohë, administrata amerikane ka shtuar presionin ndaj Meksikës për të luftuar kartelet. Presidenti Donald Trump ka paralajmëruar më parë se SHBA mund të ndërmarrë veprime të njëanshme nëse autoritetet meksikane nuk arrijnë të frenojnë grupet kriminale.
Sipas raportit, CIA ka zgjeruar bashkëpunimin me autoritetet rajonale dhe lokale në Meksikë, për shkak të shqetësimeve se disa struktura federale janë infiltruar nga kartelet e drogës. Situata ka shtuar tensionet diplomatike mes dy vendeve dhe frikën për një përshkallëzim të mëtejshëm të konfliktit në territorin meksikan.
Marrë nga CNN
