I dyshuari 22-vjeçar nga Utah, Tyler Robinson, i akuzuar për vrasjen e aktivistit konservator Charlie Kirk, u paraqit për herë të parë fizikisht në gjykatë të enjten, ndërsa avokatët e tij po kërkojnë kufizime të mëtejshme ndaj mediave në këtë çështje të profilit të lartë. Gjykatësi i Utah-s, Tony Graf, po vlerëson balancën mes së drejtës së publikut për t’u informuar dhe shqetësimeve të ekipit mbrojtës se jehona e madhe mediatike mund të ndikojë në të drejtën e Robinson për një gjykim të paanshëm.
Mbrojtja dhe zyra e sherifit të qarkut Utah kanë kërkuar që kamerat të ndalohen tërësisht në sallën e gjyqit.
Robinson akuzohet për vrasje të rënduar në lidhje me të shtënat më 10 shtator brenda kampusit të Utah Valley University në Orem. Prokurorët kanë deklaruar se do të kërkojnë dënimin me vdekje.
I akuzuari u shfaq në gjykatë me pranga në duar e këmbë dhe i veshur me këmishë, kravatë dhe pantallona të errëta. Ai buzëqeshi drejt familjarëve në rreshtin e parë, ku nëna e tij u përlot gjatë seancës. Babai dhe vëllai i tij ishin gjithashtu të pranishëm. Deri më tani, paraqitjet e Robinson kishin qenë vetëm në distancë, përmes videos apo audios nga qelia.
Ndërkohë, një koalicion mediash kombëtare dhe lokale përfshirë Associated Press po kundërshtojnë lëvizjen për të kufizuar aksesin e tyre në proces.
Gjykatësi Graf ka bërë tashmë disa lëshime për mbrojtjen e prezumimit të pafajësisë, duke pranuar se çështja ka tërhequr vëmendje “të jashtëzakonshme” publike.
Më 24 tetor ai mbajti një seancë të mbyllur ku u diskutuan veshja e të akuzuarit dhe masat e sigurisë. Vendimi pasues parashikon që Robinson të paraqitet me veshje civile gjatë seancave paraprake, por të mbetet i prangosur për arsye sigurie.
Gjithashtu, u ndalua filmimi dhe fotografimi i prangave të tij, pasi avokatët argumentuan se imazhet mund të paragjykojnë jurinë e ardhshme.
Avokati i mediave, Michael Judd, i ka kërkuar gjykatësit të lejojë që organizatat e lajmeve të shprehen për çdo kërkesë të ardhshme për seanca të mbyllura apo kufizime të tjera.
Prania e mediave në gjykatat e Utah është e kufizuar edhe në rrethana normale, me një fotograf dhe një operator video të autorizuar të ndajnë materialet me redaksitë e tjera. Gazetarët e tjerë lejohen të marrin pjesë vetëm për të ndjekur dhe raportuar.
Judd argumenton se gjykatat e hapura sigurojnë transparencë dhe rrisin besimin e publikut në sistemin e drejtësisë, duke theksuar se çështjet penale në SHBA tradicionalisht janë të hapura dhe nuk pengojnë zhvillimin e një gjykimi të drejtë.
E veja e Charlie Kirk, Erika Kirk, ka kërkuar po ashtu transparencë të plotë, duke deklaruar: “Ne meritojmë të kemi kamera aty.”
Kirk ishte aleat i Presidentit amerikan, Donald Trump dhe i angazhuar në organizimin e të rinjve konservatorë.
Avokatët e Robinson thonë se ndikimi i çështjes ka mbërritur deri në Shtëpinë e Bardhë, pasi Donald Trump deklaroi menjëherë pas arrestimit: “Me shumë siguri e kemi kapur autorin,” duke shtuar se shpresonte për dënim me vdekje.
Avokatja Kathy Nester ngriti alarm se foto e parë e Robinson në gjykatë është modifikuar gjerësisht në rrjet, duke krijuar dezinformim. Disa imazhe të falsifikuara e paraqesin atë duke qarë apo duke shpërthyer në gjykatë – gjë që nuk ka ndodhur.
Në ditët në vijim, gjykata pritet të vendosë nëse prania e mediave do të kufizohet më tej, teksa çështja vazhdon të tërheqë vëmendje të madhe kombëtare.
Marrë nga NBC News
