Dega e bankës Credit Agricole në Napoli është grabitur këtë të enjte nga persona të armatosur dhe të maskuar, të cilët sipas mediave në vendin fqinj, arritën të hynin në bankë përmes një tuneli nëntokësor, duke hapur një vrimë në dysheme, përmes së cilës më edhe pas ikën.
Alarmi u dha rreth orës 12:45 të mesditës. Njëzet e pesë persona, përfshirë klientë dhe punonjës, ishin brenda bankës, dhe grabitësit i mbajtën robër gjatë gjithë grabitjes.
Sipas mediave italiane, në bankë ka pasur momente tensioni, me të pranishmit të detyruar të qëndronin nën kërcënimin e armëve ndërsa kriminelët zbrazën disa kasaforta. Karabinierët iu përgjigjën vendit të ngjarjes, duke rrethuar zonën dhe duke ngritur postblloqe.
Pengjet u liruan menjëherë nga karabinierët dhe zjarrfikësit, por kur ata u futën në bankë grabitësit kishin ikur përmes tunelit nëntokësor që kishin hapur.
Kryeprokurori i Napolit, Nicola Gratteri gjithashtu mbërriti në vendngjarje dhe mbikëqyri personalisht operacionin. Askush nuk u lëndua, por tre pengje u trajtuan me ndihmë për shkak të frikës.
Sasia e parave dhe sendeve të vjedhura nga kutitë e sigurisë në kasafortë, ende nuk është përcaktuar.
Supozohet se grupi i kriminelëve, të maskuar me maska filmash, mund të jenë arratisur përmes sistemit të kanalizimeve. Midis atyre që u liruan nga karabinierët ishin rreth dhjetë punonjës të degës dhe disa klientë që prisnin në radhë në sportele.
Marrë nga Newsbomb.al
