Franca ka regjistruar mbi 350 qytete me temperaturat më të larta ndonjëherë për muajin maj, gjithashtu dhe Mbretëria e Bashkuar kanë vendosur rekorde kombëtare për nxehtësinë. Sipas raportimeve, rritja e temperaturave mund të shkojë në 40 gradë celcius deri në fund të javës në Spanjë. Zyra Meteorologjike e Mbretërisë së Bashkuar tha se rekordi i të gjitha kohërave i vendit për muajin maj u thye kur një temperaturë prej 34.8 gradë Celsius u regjistrua në Kopshtet Keë të Londrës.
Meteo France theksoi se temperaturat maksimale mujore për majin ishin regjistruar në 352 stacione meteorologjike kryesisht në Francën perëndimore, me temperaturën më të lartë – 37.1 gradë Celsius, të regjistruar pranë Hossegor, në departamentin jugperëndimor të Landes.
“Ky është një ngjarje e paprecedentë me një shans një në 1,000 për të ndodhur në këtë kohë të vitit bazuar në klimën nga viti 1979 deri në vitin 2025 dhe praktikisht e pamundur në epokën paraindustriale”, tha Christophe Cassou, një shkencëtar i klimës.
Më shumë nivele të reja të temperaturës ka të ngjarë të shënohen në Francë, Spanjë dhe Mbretërinë e Bashkuar, thanë parashikuesit e motit, me temperatura që tejkalojnë normat me 12 ose 13 gradë Celsius në atë që Meteo France e përshkroi si një episod të nxehtësisë “të parakohshme, të jashtëzakonshme dhe të gjatë” që pritet të zgjasë edhe disa ditë.
31 nga 96 departamentet administrative të Francës metropolitane janë vendosur në gatishmëri për temperaturë të lartë deri të martën, përfshirë tetë në nivelin portokalli, i dyti më i lartë, duke kërkuar që banorët të “marrin masa paraprake”. Ishte hera e parë që sistemi kombëtar i paralajmërimit për nxehtësinë në vend është aktivizuar gjatë majit që kur u prezantua në vitin 2004.
Ndërkohë në Spanjë, vala e vapës, ku temperaturat në disa zona jugore arritën 38 gradë Celsius gjatë fundjavës, pritet gjithashtu të vazhdojë gjatë gjithë javës, tha Rubén del Campo i zyrës shtetërore meteorologjike Aemet.
Marrë nga Le Monde
