Presidenti amerikan Donald Trump mbajti një fjalim në Kongres, prej nga i dërgoi një mesazh popullit të Grenlandës gjatë fjalimit të tij në Kongres. “Sonte kam një mesazh për njerëzit e jashtëzakonshëm të Grenlandës: ne mbështesim fuqimisht të drejtën tuaj për të përcaktuar të ardhmen tuaj”, tha Trump. “Nëse vendosni, jeni të mirëpritur në Shtetet e Bashkuara të Amerikës”, shtoi ai.
Ai tha se SHBA ka nevojë për Grenlandën për “sigurinë kombëtare dhe ndërkombëtare. Unë mendoj se ne do ta arrijmë atë. Në një mënyrë ose në një tjetër, ne do ta arrijmë atë”, tha Trump.
Trump është gjithnjë e më i zëshëm për faktin se Grenlanda, një territor autonom brenda Danimarkës, do të jetë amerikan. Gjithçka filloi pasi ai fitoi zgjedhjet në nëntor 2024. Më pas Trump shprehu dëshirën e tij për të blerë Grenlandën. Ai foli për herë të parë për këtë në vitin 2019.
Grenlanda ka qenë prej kohësh në qendër të vëmendjes së fuqive të mëdha për shkak të vendndodhjes së saj strategjike në Arktik dhe pasurisë së saj të burimeve natyrore. Shkrirja e akullit në rajon ka rritur më tej rëndësinë e tij, duke hapur rrugë të reja transporti dhe akses në burime të pasura minerale, duke përfshirë tokat e rralla që janë thelbësore për teknologjitë moderne si bateritë dhe burimet e rinovueshme të energjisë.
Sipas Këshillit të Arktikut, transporti detar përmes rrugëve të Arktikut u rrit me 37% midis 2013 dhe 2023, duke e bërë rajonin tërheqës për tregti dhe investime. Kina njoftoi tashmë planin e saj për të krijuar një “Rrugë Polare të Mëndafshit” në 2018, duke lidhur Evropën dhe Azinë përmes Oqeanit Arktik, ndërsa Rusia vazhdoi të modernizonte bazat e saj ushtarake në rajon.
Marrë nga Reporteri.net
