Sekretari amerikan i Mbrojtjes, Lloyd Austin ka deklaruar se ka prova që trupat e Koresë së Veriut janë në Rusi, por ai u tha gazetarëve se qëllimi i dislokimit nuk ishte ende i qartë.
“Ka prova se ka trupa të DPRK-së në Rusi. Çfarë po bëjnë saktësisht? Kjo mbetet për t’u parë. Këto janë gjëra që ne duhet t’i zgjidhim”, u tha Austin gazetarëve në Romë, duke përdorur emrin zyrtar të Koresë së Veriut – Republika Popullore Demokratike e Koresë.
“Nëse ata janë bashkëluftëtarë, nëse synimi i tyre është të marrin pjesë në këtë luftë në emër të Rusisë, kjo është një çështje shumë, shumë serioze. Do të ketë ndikime, jo vetëm në Evropë, por edhe në Indo-Paqësor”, tha ai.
“Ky është një tregues se ai mund të jetë edhe në më shumë telashe sesa e kuptojnë shumica e njerëzve,” tha Austin për presidentin Vladimir Putin.
Ukraina dhe Koreja e Jugut kanë akuzuar vazhdimisht Korenë e Veriut për dërgimin e trupave në Rusi për të ndihmuar në luftën e saj të vazhdueshme. NATO dhe Shtetet e Bashkuara nuk e kishin konfirmuar më parë lëvizjen e trupave.
Presidenti ukrainas Volodymyr Zelenskiy ka cituar inteligjencën për përgatitjen e dy njësive me ndoshta deri në 12,000 trupa të Koresë së Veriut, të cilët do të merrnin pjesë në luftë së bashku me forcat ruse.
