Shqipëria mbetet vendi me pasigurinë më të madhe ushqimore krahasuar me të gjitha vendet e rajonit dhe Europës. Rreth 32% e popullsisë shqiptare përballet me pasiguri ushqimore të moderuar ose të rëndë. Ndërkohë, edhe kostoja e një diete të shëndetshme është rritur ndjeshëm. Të dhënat e FAO-s tregojnë se 8.3% e shqiptarëve përballen me pasiguri të rëndë ushqimore, ndërsa rreth 12% e popullsisë nuk mund të përballojë financiarisht një dietë të shëndetshme.
Ushqimi po bëhet gjithnjë e më i vështirë për t’u përballuar për një pjesë të konsiderueshme të familjeve shqiptare. Rreth 32% e shqiptarëve nuk e kanë të sigurt aksesin në ushqim. Ky është konkluzioni i një raporti të Organizatës së Kombeve të Bashkuara për Ushqimin dhe Bujqësinë, për periudhën 2023–2025. Shqipëria renditet dukshëm më keq, jo vetëm krahasuar me mesataren europiane, por edhe me vendet e tjera të Ballkanit Perëndimor.
Niveli i pasigurisë ushqimore të moderuar ose të rëndë në Shqipëri vlerësohet në rreth 31.8%, ndërsa mesatarja europiane është vetëm 7.4%. Kjo do të thotë se treguesi në Shqipëri është rreth 4.3 herë më i lartë se mesatarja e Europës dhe rreth 5.5 herë më i lartë se mesatarja e Europës Jugore, prej 5.8%. Diferenca është e ndjeshme edhe në raport me vendet e tjera të rajonit. Për 2023–2025, pasiguria ushqimore e moderuar ose e rëndë vlerësohet në 9.2% në Maqedoninë e Veriut, 9% në Malin e Zi, 8.7% në Bosnjë-Hercegovinë dhe 6.7% në Serbi.
Në Shqipëri, kjo shifër arrin në 31.8%. Por brenda këtij grupi, një tjetër tregues është edhe më shqetësues. 8.3% e popullsisë shqiptare klasifikohet në kushtet e pasigurisë së rëndë ushqimore, familje qç mbeten pa ushqim, detyrohen të konsumojnë më pak sesa u nevojitet, përjetojnë uri apo edhe kalojnë një ditë të plotë pa ngrënë, për shkak të mungesës së parave apo burimeve të tjera.
Në këtë panoramë, një tjetër problem është edhe kostoja e një diete të shëndetshme. Sipas Monitor, dieta ditore e shqiptarëve është bërë rreth 70% më e shtrenjtë krahasuar me vitin 2017 dhe rreth 30% më e kushtueshme se mesatarja europiane.
Në më pak se një dekadë, në vendin tonç kostoja minimale për një ushqyerje të ekuilibruar është rritur me rreth 70%. Edhe në raport me Europën, diferenca është e ndjeshme. Një dietë e shëndetshme kushton në Shqipëri rreth 30% më shumë se mesatarja europiane dhe rreth 12% më shumë se mesatarja e Europës Jugore. Sipas metodologjisë së FAO-s, vlera prej 5.16 dollarësh është kostoja minimale ditore e një diete të shëndetshme për një person në Shqipëri. Përllogaritja bëhet duke marrë në konsideratë ushqimet më të lira dhe përcakton pragun minimal ekonomik për një ushqyerje të ekuilibruar. Por edhe ky minimum nuk është i përballueshëm për të gjithë. Në vitin 2025, rreth 11.9% e popullsisë shqiptare vlerësohet se nuk kishte mundësi financiare për të përballuar një dietë të shëndetshme.
Shifrat tregojnë kështu një problem që shkon përtej rritjes së çmimeve. Për një pjesë të familjeve shqiptare, sfida nuk është vetëm të ushqehen shëndetshëm, por të sigurojnë ushqimin e nevojshëm çdo ditë. Në një vend ku kostoja e ushqyerjes së shëndetshme është rritur ndjeshëm, ndërsa pasiguria ushqimore mbetet shumë më e lartë se në pjesën tjetër të Europës dhe rajonit, këto të dhëna kthehen në një tregues të fortë të presionit ekonomik mbi familjet shqiptare.
Marrë nga Syri.net
