Në Shqipëri, mesatarisht një familje mori 2 mijë euro në vit. Ky është konstatimi i një raporti të Bankës Botërore, për vitin 2023, mbi remitancat, duke pasqyruar në mënyrë të dukshme se sa të varfër jemi ne. Sipas hulumtimit 23% e familjeve, rreth 174 mijë familje shqiptare varen nga ekonomia që vjen nga jashtë, nga të afërmit e tyre emigrantë që jetojnë e punojnë , të cilat përbëjnë rreth 18% të të ardhurave të tyre totale dhe një fluks mesatar vjetor prej 2000 euro për familje. Raporti vëren se remitancat mund të kreditohen me një rënie prej 8 pikë përqindjeje të varfërisë, veçanërisht për familjet që varen vetëm nga remitancat, duke nënvizuar natyrën kritike të këtyre flukseve financiare për peizazhin social dhe ekonomik të Shqipërisë.
Në raportin e Bankës Botërorë theksohet gjithashtu se pavarësisht rëndësisë së tyre, tregu i remitancave në Shqipëri karakterizohet nga kosto të larta dhe joefikasitet të konsiderueshëm.
‘Sipas bazës së të dhënave të Bankës Botërore për Çmimet e Remitancave në mbarë botën, kostoja mesatare e dërgimit të 200 dollarëve në Shqipëri është 8.7% në tremujorin e katërt 2023, pothuajse tre herë më shumë se objektivi i Objektivit për Zhvillim të Qëndrueshëm (SDG) prej 3%. Banka Botërore vlerëson se 37% e remitancave kryhen në para të gatshme, duke anashkaluar kanalet formale’, thuhet në raport.
‘Kjo mungesë është evidente në nivelet e ulëta të përfshirjes financiare dhe njohjes së produkteve financiare në vend. Gjithashtu, mirëqenia financiare në Shqipëri vlerësohet në një nivel të ulët 7.7 nga 22, me pasigurinë financiare që prek më shumë gratë, të rinjtë dhe të moshuarit, më pak të arsimuarit, të papunët dhe individët me të ardhura të ulëta’, thekson raporti i Bankës Botërore.
Për Bankën Botërore madje remitancat janë 2-fish më të larta nga sa Banka e Shqipërisë raporton. Vitin e shkuar u dërguan nga emigrantët gjithësej 1.9 miliardë euro, thekson Banka Botërore. Shifra është 971 milionë euro ose 104.5 për qind më e lartë nga ajo që Banka e Shqipërisë deklaron.
