Dy nga godinat e para që janë ndërtuar në projektin “Durrës Marina” kanë pësuar ulje me 74 centimetra. Ka qenë kjo dëshmia tronditëse nga brenda kantierit të projektit gjigant për emisionin investigativ Piranjat.
Sipas një nënkontraktori që po kryen punimet e betonit, dy pallatet e para kanë pësuar ulje të konsiderueshme në tokë, duke arritur deri në 74 centimetra zhytje.
“Dy pallatet e para që I ka bërë Elmazaj, kanë çeduar, kanë bërë ulje. Aktualisht që flasim janë 74 cm ulje, janë zhyt poshtë. Unë jam një nga nënkontraktorët që kamë një pjesë të punimeve të betonit aty brenda. Dy pallatet e para, po sidomos I pari është zhytur më shumë.” – thotë ai në dëshminë e dhënë për emisionin Piranjat.
Ai shton më tej se punimet janë kryer pa cilësi dhe duke mos marrë parasysh terrenin ranor e argjilor duke mos futur pilota, gjë që ka sjellë edhe zhytjen.
“Para një muaji aty është bërë problem i madh. Patën vënë edhe dyer e dritare dhe në momentin që çeduan themelet, plasën ato. Në kohën kur bëmë bodrumet, na thërritën: Ej sa ka plas platea, themeli. I bëmë edhe një shtresë tjetër sa mos dukej. Ore ka bë ulje gjithë objekti. Ajo në fillim ka qenë gjysmë kalatë dhe nuk ka pas pilota. Por nuk lejohet të bëhet ndërtimi pa pilota aty. Për të kursyer lekët, këta menduan që meqë ka qenë mol porti, do mbajë bazamenti. Tani pas dy vjetësh çedoi, ka bërë ulje. Është zhytur poshtë, sepse është kënetë.” – shton dëshmitari.
Pas shfaqjes së problemeve, në objekt janë konstatuar dëmtime serioze, përfshirë çarje të strukturës dhe thyerje të elementëve të vendosur si dyer dhe dritare. Aktualisht, sipas dëshmisë, po kryhen ndërhyrje përforcuese anësore me pilota, një zgjidhje që ekspertët e konsiderojnë të pamjaftueshme nëse nuk është aplikuar që në fillim.
“Tani janë duke bërë përforcime anësore, janë duke ngul pilota. Kjo firma turke sepse pas këtij problemi, firma u rimblodh dhe janë duke bërë gjithën zonën me blinda, p[ilota sepse e kliptuahn që zona nuk mban. Mbi këto blinda do ndërtohet ,ndërsa dy të parat janë fundos. Aty po punojnë anash sa lejon hapësira dhe po vënë blinda anësore. Bëhet fjalë për rreth 60 milionë euro për blindat që do futen 30 metra nën tokë.” – tha dëshmitari.
Projekti i njohur ndryshe si kompleksi i Alabarit është prezantuar si një investim strategjik prej 3.2 miliardë eurosh në zonën e portit të Durrësit. Sipas Piranjave, matjet e kryera në terren, përmes teknologjisë së dronit, konfirmojnë një disnivel të konsiderueshëm mes godinave. Rezultatet tregojnë diferenca nga 70 centimetra deri në 1 metër mes strukturave, duke përputhur kështu denoncimin e bërë nga burimi brenda projektit.
Për vitet 2023-2024 janë shpenzuar rreth 41 milionë euro për punime, ndërkohë që vetë kompania ka investuar vetëm një pjesë të vogël të kapitalit nga fondet e saj, duke u mbështetur kryesisht në shitjen e apartamenteve në fazë projekti.
Marrë nga Emisioni “Piranjat” në Syri TV
