Qeveria ka marrë sot vendim për të autorizuar Korporatën e Investimeve Shqiptare për të koordinuar procesin e identifikimit të pronës shtetërore me interes për realizimin e projekteve në zonën industriale të ish-kombinatit, në bashkëpunim me Bashkinë e Elbasanit, mëson ekofin.al.
Ministria e Ekonomisë, Kulturës dhe Inovacionit është institucioni përgjegjës për ndjekjen e mëtejshme të projektit.
Në mars, Kryeministri Edi Rama kishte prezantuar projektin ambicioz për transformimin e ish-Kombinatit Metalurgjik të Elbasanit në një park kombëtar industrial, me fokus në zhvillimin ekonomik dhe bashkëpunimin me sektorin privat. Sipas Ramës, ky projekt synon të kthejë zonën në një destinacion industrial të rëndësishëm, duke e integruar me një automotopark që do të lidhë drejtpërdrejt Tiranën me Elbasanin.
“Ideja themelore është që ky park duhet të jetë një destinacion për të gjithë, dhe, së bashku me automotoparkun, do të bëhet një pikë kyçe që bashkon dy qytetet dhe rrit frymëmarrjen urbane dhe ekonomike të kryeqytetit,” deklaroi Kryeministri Rama.
Ai theksoi gjithashtu se distanca për të punuar në këtë zonë është më e shkurtër ose e barabartë me udhëtimin brenda Tiranës, çka e bën projektin praktik dhe të aksesueshëm për fuqinë punëtore.
Ky vizion i ri për Elbasanin pritet të rrisë atraktivitetin e qytetit për investime, të krijojë vende të reja pune dhe ta përfshijë atë si pjesë të metropolit të ardhshëm ekonomik të Shqipërisë.
Qeveria ka miratuar gjithashtu sot dhënien e autorizimit për Korporatën e Investimeve për zhvillimin e pasurisë nr. 3/257 në zonën kadastrale 8210, me qëllim rijetëzimin e Pallatit të Lojërave me Dorë “Asllan Rusi”.
Marrë nga Ekofin.al
