Kryeqyteti i Kroacisë, Zagrebi, po ndërmerr masa drastike për të frenuar krizën e strehimit, e cila po rëndohet nga rritja e çmimeve dhe ekspansioni i qirave afatshkurtra për qëllime turistike.
Në një intervistë për portalin “Balcani Caucaso”, zëvendëskryetari i Bashkisë, Luka Korlaet, shpjegoi strategjinë e administratës për të mbrojtur të drejtën e banorëve për strehim të përballueshëm.
Sipas të dhënave zyrtare, situata është kritike. Paga mesatare neto në Zagreb në fund të vitit 2025 ishte 1.650 euro, ndërsa qiraja mesatare ka arritur në 900 euro.
Ky disproporcion bën që shumë familje të kalojnë pragun kritik prej 30 për qind të të ardhurave për shpenzime strehimi.
Një nga pikat më të nxehta të diskutuara është ndikimi i turizmit. Korlaet theksoi se raporti midis apartamenteve për banim dhe atyre për qira afatshkurtër është tejet i pabalancuar. Për të adresuar këtë, bashkia e ka rritur taksën vjetore për çdo shtrat nga 40 në 200 euro.
“Të gjitha këto masa synojnë të ribalancojnë ofertën dhe kërkesën, duke mbyllur kështu të ashtuquajturin boshllëk strehimi prej deri në 38.000 apartamentesh”- thotë Korlaet.
Edhe pse sektori i ndërtimit po lulëzon, Zagrebi përballet me një fenomen shqetësues: mijëra apartamente qëndrojnë bosh. Korlaet vuri në dukje se numri i tyre varion nga 54.000 deri në 85.000, duke sugjeruar se ato nuk ndërtohen për strehim, por si investime kapitali.
Bashkia menaxhon aktualisht rreth 6.300 apartamente, ku 60 për qind e tyre përdoren për strehim social me qira simbolike prej 0.36 euro për metër katror për shtresat më të varfra.
Ngjashëm me Zagrebin, Tirana po përballet me një bum në tregun e pasurive të paluajtshme. Gjatë vitit 2025, qiratë në kryeqytetin shqiptar pësuan rritje rekord, ku platformat si Airbnb kanë nxjerrë mijëra apartamente nga tregu i qirave afatgjata.
Ndërsa në Zagreb taksa për shtrat u rrit 5-fish për të dekurajuar këtë tendencë, Tirana vazhdon të ketë një treg kryesisht të paformalizuar, ku familjet e reja po detyrohen të zhvendosen në periferi për shkak të çmimeve që kapin shifra deri në 800 euro për apartamentet në qendër.
Për t’iu përgjigjur kësaj krizë, Tirana mund të marrë shembull nga menaxhimi racional i Zagrebit, sidomos në krijimin e një stoku publik banesash dhe rregullimin e qirave afatshkurtra.
Marrë nga Tesheshi.com
