Numri i ndërmarrjeve aktive në Shqipëri vijoi të rritet gjatë vitit 2025, ndërsa u regjistruan edhe më shumë biznese të reja krahasuar me një vit më parë.
Sipas të dhënave të publikuara nga INSTAT, në fund të vitit 2025 në vend numëroheshin 137.892 ndërmarrje ekonomike aktive, me një rritje prej 4,3% krahasuar me vitin 2024. Në të njëjtën kohë, regjistri i njësive ligjore arriti në 250.097 njësi aktive, 5,1% më shumë se një vit më parë.
Gjatë vitit 2025 u regjistruan 18.297 ndërmarrje të reja, nga 15.970 që ishin regjistruar në vitin 2024, duke reflektuar një zgjerim të aktivitetit sipërmarrës në vend.
Të dhënat tregojnë se ekonomia shqiptare vijon të dominohet nga sektori i shërbimeve. Rreth 85,9% e ndërmarrjeve aktive operojnë në grupin e “Prodhuesve të shërbimeve”, ku përfshihen tregtia, transporti, magazinimi, akomodimi, shërbimet ushqimore, informacioni dhe komunikacioni, si edhe shërbime të tjera. Këto ndërmarrje realizojnë 68,2% të shitjeve neto në ekonomi.
Ndërkohë, grupi i “Prodhuesve të të mirave”, ku përfshihen bujqësia, pyjet, peshkimi, industria dhe ndërtimi, përfaqëson 14,1% të ndërmarrjeve aktive dhe gjeneron 31,8% të shitjeve neto.
INSTAT vëren gjithashtu se vetëm 1,5% e ndërmarrjeve kanë 50 ose më shumë të punësuar, por këto kompani punësojnë 48,6% të totalit të të punësuarve dhe realizojnë 44,8% të shitjeve neto vjetore.
Sipas raportit, ndërmarrjet me pronarë ose bashkëpronarë të huaj përbëjnë 5% të totalit të ndërmarrjeve aktive, por punësojnë 12,5% të të punësuarve në vend.
Ndërkohë, pjesëmarrja e grave në biznes vijon të shënojë rritje të lehtë. Në vitin 2025, gratë menaxhonin ose zotëronin 31,6% të ndërmarrjeve aktive, kundrejt 31,4% një vit më parë. Përqindja më e lartë e grave në pozicione vendimmarrëse u regjistrua në sektorët e tregtisë dhe shërbimeve të tjera.
Marrë nga Skyweb.al
