Pas deklaratave të kryeministrit të zgjedhur hungarez Magyar për hetimin e kompanive që dyshohet se përbënin kolonën e sistemit korruptiv të ngritur në Hungari nga Viktor Orban, aksionet e kompanisë 4iG kanë humbur mbi 32 për qind të vlerës së tyre brenda një muaji të vetëm.
Kompania 4iG zotëron kompaninë e telefonisë celulare në Shqipëri, One Telecommunications. 4iG e konsideruar si një biznes vasal i kryeministrit të larguar Orban mund të përballet me telashe ligjore.
Kryeministri i zgjedhur Magyar ka deklaruar publikisht se qeveria do të ngrejë një zyrë të posaçme, e cila do të gjurmojë dhe konfiskojë pasuritë e grupit të ashtuquajtur NER, kompani private, që dyshohet se përbënin kolonën e sistemit korruptiv në Hungari.
Kjo është edhe arsyeja se pse aksionet e 4iG janë duke rënë në pikiatë dhe, krahasuar me pikun e tyre në fund të vitit të kaluar, çmimi i tyre ka rënë me më shumë se dy herë.
Por vetë kompania 4iG është mbrojtur duke deklaruar publikisht se aktiviteti i saj është ngritur mbi baza të shëndosha dhe kontratat e saj me prodhuesit amerikanë të armëve kryesorë globalisht, siç është Northrop Grumman, ofrojnë një garanci për rritje të mëtejshme.
Nëse qeveria e re në Hungari do të klasifikojë edhe paratë e blerjes së One nga 4iG si të ardhura nga korrupsioni, kjo mund të hapte skenarë të tjerë për të ardhmen e One në Shqipëri.
Marrë nga Balkanweb.com
