Vetëm pak ditë pasi doli publikisht kundër Edi Ramës, duke i kërkuar të marrë përgjegjësi për situatën politike në vend dhe të mos e konsiderojë veten të pazëvendësueshëm, ish-kryetarja e Kuvendit, Elisa Spiropali, ka njoftuar se i është bllokuar faqja zyrtare në Facebook.
Përmes një postimi në Instagram, Spiropali bën të ditur se prej tre ditësh nuk ka akses në faqen e saj, ndërsa po bashkëpunon me kompaninë Meta për rikthimin e saj. “Prej tre ditësh, faqja ime zyrtare në Facebook është e bllokuar. Po punojmë ngushtë me Meta-n që ta rikthejmë sa më shpejt”, shkruan ajo.
Ish-kryetarja e Kuvendit u ka bërë thirrje qytetarëve që dëshirojnë ta kontaktojnë të përdorin përkohësisht Instagramin, duke i falënderuar për mbështetjen.
Kujtojmë se më 16 tetor, Spiropali publikoi një letër të hapur drejtuar Ramës, ku kritikoi qëndrimin e tij ndaj krizës politike dhe kërkoi që zgjedhjet e parakohshme apo rotacioni politik të mos konsiderohen tabu.
Ende nuk dihen arsyet e bllokimit të Facebook-ut të Spiropalit dhe nuk ka asnjë konfirmim që ky zhvillim lidhet me qëndrimet e saj politike.
Marrë nga Newsbomb.al
