Presidenti Vladimir Putin është bërë gjithnjë e më i shqetësuar për shtrembërimet në ekonominë e kohës së luftës në Rusi, pikërisht kur Donald Trump po shtyn për t’i dhënë fund konfliktit në Ukrainë.
Ekonomia e Rusisë, e nxitur nga eksportet e naftës, gazit dhe mineraleve, ka shënuar rritje të fortë gjatë dy viteve të fundit, pavarësisht disa raundeve të sanksioneve perëndimore të vendosura pas pushtimit të saj në Ukrainë në vitin 2022.
Por aktiviteti i brendshëm është tensionuar muajt e fundit nga mungesa e fuqisë punëtore dhe normat e larta të interesit, të vendosura për të luftuar inflacionin, i cili është përshpejtuar për shkak të shpenzimeve rekord ushtarake.
Kjo ka kontribuar në perceptimin brenda një pjese të elitës ruse se një zgjidhje e negociuar e luftës është e dëshirueshme, sipas dy burimeve që janë të njohur me mendimin në Kremlin.
Këtë javë ai ka deklaruar se janë të mundshme sanksione dhe tarifa të tjera ndaj Rusisë nëse Putin nuk negocion, duke shtuar se Rusia po shkon drejt “problemeve të mëdha” në ekonomi. Një ndihmës i lartë i Kremlinit tha të martën se Rusia deri tani nuk ka marrë asnjë propozim specifik për bisedime.
“Rusia, natyrisht, ka interes ekonomik për të negociuar një përfundim diplomatik të konfliktit,” tha në një intervistë Oleg Vyugin, ish-nënkryetar i Bankës Qendrore të Rusisë, duke përmendur rrezikun e shtrembërimeve të mëdha ekonomike ndërsa Rusia përshpejton shpenzimet ushtarake dhe të mbrojtjes.
Vyugin nuk ishte një nga pesë burimet, të cilët të gjithë folën në kushte anonimiteti për shkak të ndjeshmërisë së situatës në Rusi.
Reuters ka raportuar më parë se Putin është i gatshëm të diskutojë opsione për një armëpushim me Trump, por se fitimet territoriale të Rusisë në Ukrainë duhet të pranohen dhe Ukraina duhet të heqë dorë nga përpjekja për t’u bashkuar me NATO-n e udhëhequr nga SHBA-ja.
Zëdhënësi i Kremlinit Dmitry Peskov, kur u pyet për raportimin e Reuters-it, pranoi “faktorët problematikë” në ekonomi, por tha se ajo po zhvillohej me një ritëm të lartë dhe ishte në gjendje të plotësonte “të gjitha kërkesat ushtarake në mënyrë graduale” si dhe të gjitha nevojat sociale dhe të mirëqenies.
“Ka probleme, por për fat të keq, problemet tani janë shoqërueset e pothuajse të gjitha vendeve të botës,” tha ai. “Situata vlerësohet si e qëndrueshme, dhe ka një margjinë sigurie.”
Trump “është i fokusuar në përfundimin e kësaj lufte brutale,” duke angazhuar një gamë të gjerë aktorësh, tha zëdhënësi i Këshillit të Sigurisë Kombëtare të Shtëpisë së Bardhë, Brian Hughes, në përgjigje të pyetjeve të Reuters-it. Në javët e fundit, këshilltarët e Trump-it kanë tërhequr deklaratat e tij të mëparshme se lufta trevjeçare mund të zgjidhej për një ditë.
Marrë nga Reuters
