Goditje për Brukselin, i cili i mirëpriste bisedimet e anëtarësimit. Islanda nuk dëshiron të rifillojë bisedimet për anëtarësim në BE.
Islanda nuk do të rifillojë negociatat e anëtarësimit me Bashkimin Europian. Pas referendumit të zhvilluar të shtunën, 52,8 për qind e qytetarëve të ishullit nordik votuan kundër rifillimit të bisedimeve me BE, njoftoi të dielën transmetuesi publik RUV pas numërimit të të gjitha votave. Në favor të rifillimit të negociatave u shprehën 47,2 për qind e votuesve. Diferenca mes dy kampeve ishte rreth 12 600 vota.
Ky rezultat përbën një humbje për kryeministren socialdemokrate Kristrún Frostadóttir, e cila kishte premtuar se qeveria do të respektonte vullnetin e qytetarëve. Që në marrjen e detyrës, në fund të vitit 2024, ajo kishte folur për mundësinë e zhvillimit të një referendumi mbi rifillimin e negociatave me Bashkimin Europian.
BE e mirëpriste Islandën
Rezultati i referendumit shihet si goditje e rëndë për Brukselin, pasi BE-ja ka shprehur interes të madh për anëtarësimin e Islandës. Vendi me afro 400.000 banorë kishte paraqitur kërkesën për anëtarësim në BE pas krizës financiare të vitit 2009. Negociatat u ndërprenë në vitin 2013, kur në Reykjavik erdhi në pushtet një qeveri euroskeptike.
Kërcënimet e presidentit amerikan Donald Trump për të aneksuar Grenlandën fqinje, lufta në Ukrainë, si dhe inflacioni në rritje dhe normat e larta të interesit, i kanë bërë disa islandezë të rishqyrtojnë qëndrimin e tyre ndaj BE-së.
Megjithatë, veçanërisht në sektorin e peshkimit, i cili është jetik për ekonominë e vendit, vazhdon të mbizotërojë kundërshtimi ndaj anëtarësimit në Bashkimin Evropian.
Megjithatë, debati në këtë shtet ishullor me rreth 400 000 banorë u përqendrua më shumë te industria e peshkimit, i cili është jetik për ekonominë e vendit, sesa te shqetësimet për sigurinë. Nga rreth 270 000 qytetarë me të drejtë vote, pjesëmarrja ishte 82.5%, niveli më i lartë i regjistruar në një proces zgjedhor në Islandë që nga viti 2009.
Islanda është tashmë pjesë e tregut të përbashkët të BE-së dhe zonës Shengen, e cila mundëson lëvizjen pa kontrolle kufitare. Anëtarësimi i plotë në BE do ta përfshinte vendin në unionin doganor dhe, në një fazë të mëvonshme, do të sillte edhe adoptimin e euros.
Marrë nga Politico.eu
