Laburisti David Lammy bëhet sekretari i ardhshëm i jashtëm i Britanisë, ku zotohet të rivendosë marrëdhëniet me Bashkimin Evropian dhe të shtyjë për një armëpushim në Gaza, ndërsa kërkon të ndërtojë lidhje me Partinë Republikane të Donald Trump.
Partia Laburiste e qendrës së majtë fitoi një fitore dërrmuese në zgjedhjet parlamentare të së enjtes, duke i dhënë fund 14 viteve të qeverisë konservatore dhe duke u zotuar të sjellë ndryshime në Britani. Ndërsa 6 prioritetet fillestare të premtuara në manifestin e tij zgjedhor përqendroheshin në çështjet e brendshme, një listë e gjatë çështjesh ndërkombëtare është në tavolinën e punës së kryediplomatit të ri.
Laburistët kanë thënë se paqja dhe siguria afatgjatë në Lindjen e Mesme do të ishte një fokus i menjëhershëm. Partia është zotuar të njohë një shtet palestinez si një kontribut për një proces të rinovuar të paqes që rezulton në një zgjidhje me dy shtete.
51-vjeçari që merr çelsat e diplomacisë zhvilloi disa udhëtime pune para zgjedhjeve, veçanërisht në Shtetet e Bashkuara, ku ai ka punuar për të ndërtuar lidhje me republikanët, pasi dikur shkroi në revistën Time se Trump ishte një “sociopat neo-nazist që urrente gratë”. Ai ka takuar figura republikane, duke përfshirë Pompeo-n, që shihen si kandidatë në hije në kabinetin e ri të Trump, nëse ai vjen në pushtet.
Lammy ka lidhje të forta me eksponentë të rëndësishëm të demokratëve, dhe është mik i ngushtë i ish-presidentit Barack Obama, shoqëri që daton nga vitet studentore në Fakultetin e Drejtësisë në Harvard. Duke iu referuar situatës në SHBA, Lammy tha se do të kërkojë të gjejë një kauzë të përbashkët me Donald Trump. Duke iu referuar këtij të fundit, Lammy tha se: “Nuk besoj se ai po argumenton se SHBA duhet të braktisë Evropën. Ai dëshiron që evropianët të bëjnë më shumë për të siguruar një Evropë më të mbrojtur”.
Lammy, djali i emigrantëve gujanez, përfaqëson një zonë elektorale të Londrës dhe ka kaluar pjesën më të madhe të karrierës së tij politike duke bërë fushatë për drejtësi sociale dhe racore.
Ai mbështeti qëndrimin e Britanisë në Bashkimin Evropian në referendumin e vitit 2016. Ndërsa laburistët kanë premtuar se Britania do të qëndrojë jashtë bllokut, Londra dëshiron të rivendosë marrëdhëniet dhe të kërkojë të thellojë lidhjet, duke përfshirë një pakt të ri sigurie Mbretëri e Bashkuar-BE.
Ai nuk i ka kursyer fjalët e ashpra as ndaj Marine Le Pen, duke e konsideruar lideren e Frontit Nacional në Francë, si një udhëheqëse ksenofobe dhe keqdashëse.
“Franca është një nga aleatët më të afërt të Britanisë dhe ne do të punojmë me këdo që të zgjidhet. Është një demokraci dhe varet nga populli francez që i qeveris ata,” u tha Lammy gazetarëve në fillim të kësaj jave. “Do të presim të shohim se çfarë do të ndodhë në raundin e dytë më 7 korrik”.
