Duke filluar nga 1 janari do të nisë dhe rivlerësimi i pasurive të paluajtshme me një normë tatimore prej 5%.
Projektligji “për fshirjen, shuarjen dhe pagesën e detyrimeve tatimore ndaj administratës tatimore qendrore e të detyrimeve të pagueshme në doganë” – 73 vota pro, 0 abstenim, 14 vota kundër.
Ky projektligj është kritikuar ashpër nga opozita, e cila ka kërkuar nga qeveria të bëjë publike listën e përfituesve. Por asnjë nga amendamentet nuk u miratua, por morën kundërshtimin nga mazhoranca.
Sipas këtij ligji, që mori dritën jeshile pas mesnate në seancën maratonë në Kuvend, të gjitha detyrimet e krijuara deri në 31 dhjetor 2014 fshihen automatikisht, me përjashtim të sigurimeve shoqërore dhe shëndetësore.
Janë afro 2 miliardë euro që preken nga kjo nismë e miratuar, nga të cilat 1 miliardë euro borxhe që falen automatikisht pasi janë me vjetërsi mbi 10 vite, pa përfshirë detyrimet për sigurimet shoqërore.
Ndërsa borxhet e krijuara si doganore, ashtu edhe tatimore nga 2015-2024 do të lehtësohen vetëm nëse paguhen detyrimet.
Eno Bozdo: Nga fshirja e detyrimeve përfitojnë persona që kanë në pronësi kompani, edhe nëse ato kanë përfituar tendera e kontrata publike. Individët duhet të përjashtohen nga fshirja dhe shuarja; kategoritë e tilla duhet përjashtuar.
Kemi kërkuar që 3 mijë biznese që përfitojnë më shumë të publikohen në faqen online, që komuniteti publik të dijë kush ka përfituar nga falja. Kjo nuk ka lidhje me privatësinë e të dhënave. Si tatimet dhe doganat mund të nxjerrin debitorët në faqet e tyre.
Milva Ikonomi: Në komision, një pjesë është vendosur për t’u marrë në konsideratë nga kjo listë.
Niko Peleshi: I votuam sipas propozimeve; shihet rezultati.
Agron Shehaj: Me këtë projektligj ka dyshime të forta që është falja e gjobave ndaj Bankers Petroleum. E papranueshme që mos të ketë transparencë për një gjobë 120 milionë euro. Kemi pyetur dhe Ministrinë e Financave dhe nuk na është përgjigjur. Kjo është për të shpëtuar këtë kompani. Të ndryshohet ky nen që të përjashtohet kompania Bankers nga përfitimi i faljes së gjobave.
Petrit Malaj: Ju sqarova me gjobën e Bankers; nëse përfiton, është e shkruar në ligj që ata që janë në hetim nuk përfitojnë nga ligji i shuarjes. Për sa i përket gjobës së doganave, drejtoria e doganave po merr të gjitha masat për të vjelur këtë gjobë.
Agron Shehaj: Z. Ministër, sapo konfirmuat që Bankers nuk e ka paguar akoma gjobën. Z. Ministër, a ka para Bankers për të paguar? Çfarë po prisni? 2 vjet për 120 milionë euro?
Ju jeni të gatshëm të garantoni që me kalimin e këtij projektligji, 120 milionë euro të Bankers do të kalojnë në buxhetin e shtetit? Mund të dilni garant, z. Ministër? Vëmendje, të mbani fjalën?
Kërkojmë që lista e përfituesve të publikohet në faqen e institucioneve.
Marrë nga Top Channel
