Policia e Peqinit ka nisur procedim penal ndaj pronarit të një lokali në fshatin Pekisht, pas zbulimit të materialeve të dyshuara zgjedhore në ambientet e tij. Rasti u denoncua fillimisht një ditë më parë nga kreu i Partisë Demokratike, Sali Berisha.
Sipas njoftimit zyrtar të Policisë, gjatë një kontrolli të kryer në bashkëpunim me Prokurorinë e Elbasanit, në lokalin e shtetasit D. B. u gjetën dhe u sekuestruan 10 fletë të ngjashme me ato të votimit, të paplotësuara dhe të dyshuara si të falsifikuara, si dhe një listë emërore e zgjedhësve.
Gjithashtu, autoritetet bënë të ditur se në portofolin e pronarit të lokalit u gjetën 280 000 lekë, të cilat po ashtu janë sekuestruar.
Kontrolli u shtri edhe në banesën e shtetasit D. B., ku u zbuluan një pushkë e vjetër trofe dhe një pistoletë zhurmuese (sportive), të cilat u sekuestruan nga policia.
Ndaj shtetasit D. B. ka nisur procedim penal për veprat “Falsifikimi i materialit zgjedhor dhe rezultateve të zgjedhjeve” dhe “Prodhimi dhe mbajtja pa leje e armëve të gjuetisë dhe sportive”.
Njoftimi i plotë i Policisë:
Specialistët për Hetimin e Krimeve të Komisariatit të Policisë Peqin, pas njoftimit të marrë më datë 22.05.2025, se në një lokal në fshatin Pekisht, ishin gjetur disa materiale të dyshuara zgjedhore, kanë shkuar menjëherë në adresën e dhënë, me qëllim verifikimin e rastit.
Gjatë veprimeve të kryera në vendngjarje, në bashkëpunim me Prokurorinë e Elbasanit, në lokalin e shtetasit D. B., janë gjetur dhe sekuestruar 10 fletë të ngjashme me fletët e votimit, të paplotësuara, të dyshuara të falsifikuara, si dhe një listë emërore e zgjedhësve. Gjithashtu, është sekuestruar portofoli i shtetasit D. B., me 280 000 lekë.
Më tej, gjatë kontrollit në banesën e shtetasit D. B., janë gjetur një pushkë e vjetër trofe dhe një pistoletë zhurmuese (sportive).
Në vijim të veprimeve për rastin, specialistët për Hetimin e Krimeve të Komisariatit të Policisë Peqin referuan materialet procedurale në Prokurori, ku nisi procedimi penal për shtetasin D. B., për veprat penale “Falsifikimi i materialit zgjedhor dhe rezultateve të zgjedhjeve” dhe “Prodhimi dhe mbajtja pa leje e armëve të gjuetisë dhe sportive”.
Materialet procedurale iu referuan Prokurorisë, për veprime të mëtejshme hetimore.
Marrë nga VNA.al
