Kuvendi është mbledhur sot në seancën e radhës plenare ku në rend të ditës janë parashtruar për t’u diskutuar tre projektligje. Dy deputetët e rinj në Kuvend kanë marrë detyrën e tyre sot. Që në nisje të seancës plenare është bërë betimi i deputetëve Andrea Mano dhe Erjon Meka. Pas heqjes së mandatit të Salianjit, vendin e tij në Kuvend e zuri Andrea Mano, ndërsa vendin e Jurgis Çyrbes e ka marrë Erjon Meka.
Deputetët e Partisë Demokratike janë bllokuar nga Garda ditën e sotme që të futen në Kuvend. Teksa brenda sallës së Kuvendit zhvillohej seanca plenare në mënyrë të qetë, jashtë Kuvendit vazhdonin tensionet. Tensionet në Kuvend janë rikthyer pas disa minutash në qetësi. Teksa deputetja Albana Vokshi dhe Oerd Bylykbashi kanë shkuar në foltore, Kuvendi është mbushur nga punonjësit e Gardës.
Deputeti Asllan Dogjani është shprehur që qytetarët vriten nga bandat ndërsa policia merret me deputetët e opozitës për të ruajtur karrigen e Ramës. Deputetët demokratë që u futën në sallë, kanë marrë karriget dhe i kanë nxjerr jashtë.
Kreu i Grupit Parlamentar të Partisë Demokratike Gazment Bardhi ka deklaruar sot se do të dorëzojë në Kuvend projektligjin për Statusin e Minatorit. Bardhi tha për mediat se kjo vjen pasi një pjesë e kolegëve kanë patur mundësi të takojnë minatorët. Ai shtoi se kjo është firmosur nga një pjesë e tyre.
Deputetët demokratë që nuk janë lejuar që të futen në Kuvend, kanë vendosur të ulen dhe të qëndrojnë këmbëkryq jashtë godinës.
Deputeti Enkelejd Alibeaj, tha sot në seancë plenare se parlamenti nuk po kryen funksionin e tij sepse opozita u përjashtua. Ai iu drejtua kryetare së Kuvendit duke i thënë se përgjegjësia për funskionimin e parlamenti është e mazhorancës. Alibeaj shtoi se mazhoranca po përpiqet të krijoni një konflikt artificial, sepse përfitojnë.
Deputeti opozitar Agron Shehaj kërkoi sot në Kuvend zbatimin e urdhrit të Prokurorisë së Durrësit për sekuestrimin e 102 kontejnerëve me mbetje toksike në Portin e Durrësit. Shehaj tha se ajo që ndodh jashtë portit të Durrësit është alarmante. Gjithashtu Shehaj shtoi se situata është qesharake dhe akuzoi qeverinë për tallje me qytetarët dhe institucionet. Shehaj më pas i dërgoi ministrit të Brendshëm në duar një shkresë.
Sekretari i Përgjithshëm i PD, Flamur Noka është shprehur se ky regjim i ka shpallur luftë opozitës dhe kanë vendosur që komunizmi të mbretërojë në Shqipëri. Noka tha se deputetët e kanë vendin brenda dhe jo jashtë Kuvendit, ndërsa tha se qeveria do që në vendin tonë të mbizotërojë monizmi.
Deputeti i Partisë Demokratike Dashnor Sula është shprehur se janë paguar paratë për karriget e reja dhe këta i kanë vjedhur pasi nuk janë zëvendësuar. Sula në fjalën e tij përpara mediave, ka theksuar se opozita është në SPAK për shkak të protestave dhe jo si mazhoranca për vjedhje dhe lidhjet e tyre me bandat.
