Nga Hudson Crozier
Një organizatë e financuar nga rrjeti jofitimprurës i miliarderit të majtë George Soros drejton një program që u paguan studentëve për të protestuar kundër “Kompleksit ushtarako-industrial” në kampuset e tyre universitare.
Dissenters, një grup aktivistësh me bazë në Çikago, u bëri thirrje studentëve të universiteteve “të prekur nga lufta dhe militarizmi” të aplikonin deri me 7 gusht për një “Bursë për organizimin antimilitarist”, në një postim në Instagram të 31 korrikut. Programi ofron pagesa prej 2500 ose 3000 dollarësh për semestrin e vjeshtës, ose 6000 dollarë për një angazhim njëvjeçar. Pjesëmarrësit pritet të angazhohen të paktën 15 orë në javë “duke organizuar dhe marrë pjesë në aktivitetet e bursës”, tha Dissenters në postim.
Sipas deklaratave tatimore të viteve përkatëse, Dissenters mori 305,000 dollarë nga viti 2020 deri në 2023 nga Foundation to Promote Open Society e Sorosit, përmes katër granteve. Tre prej tyre shkuan për programin e bursave të Dissenters ose për punën e përgjithshme me studentët e universiteteve, ndërsa i katërti ndihmoi grupin të “promovonte një kuadër më gjithëpërfshirës, të drejtë dhe të përgjegjshëm për sigurinë kombëtare në SHBA dhe në mbarë botën”, sipas dokumenteve të fondacionit. Open Society Foundations i tha Washington Examiner se Dissenters”nuk është aktualisht përfitues i granteve” dhe nuk pranoi të komentonte më tej.
Foundation to Promote Open Society i kaloi grantet përmes dy organizatave që sponsorizojnë Dissenters: Center for Third World Organizing në Kaliforni dhe Watershed Center në Nju-Jork. Të dyja organizatat nuk iu përgjigjën kërkesave të Washington Examiner për koment.
“Ne mbështesim udhëheqjen e njerëzve të prekur drejtpërdrejt nga sistemet e luftës, policimit dhe militarizmit”, tha Dissenters në postimin e tij. “Kandidatët me identitete të prekura drejtpërdrejt inkurajohen fuqimisht të aplikojnë.”
Puna e studentëve do të përfshijë nxitjen e universiteteve për të ndërprerë bashkëpunimin me “kompanitë e përfshira në Kompleksin Ushtarako-Industrial”, pengimin e ushtrisë amerikane dhe prodhuesve të mbrojtjes që të rekrutojnë në universitete, si dhe një “fushatë të hartuar nga vetë studenti”, tha Dissenters. Përveç financimit, bursa ofron “bazat e organizimit antimilitarist” dhe “zhvillim të thellë të aftësive drejtuese, mentorim dhe komunitet”, sipas grupit.
Dissenters ishte kritikuar më parë nga organizata konservatore Capital Research Center për bashkëhartimin e një “Manuali për organizimin e solidaritetit të të zinjve dhe palestinezëve”, i cili përmbante një imazh ku dukej një parashutist i Hamasit duke fluturuar drejt një muri kufitar. Manuali përmbante gjithashtu një fotografi të aktivistes palestineze Leila Khaled, e cila fitoi statusine ikonës në qarqet e majta për rrëmbimin e avionëve në vitet 1969 dhe 1970.
Sipas faqes së saj të internetit, grupi i financuar nga Sorosi ka përhapur misionin e tij në kampuset universitare përmes programit të bursave studentore që prej vitit 2021.
Marrë nga Washington Examiner
