Autoriteti Kombëtar i Ushqimit po shfaq paqartësi dhe kontradikta në deklaratat lidhur me rastin e helmimit të 52 studentëve të Akademisë së Sigurisë në Sauk.
Pesë ditë më parë, AKU vendosi bllokimin e aktivitetit të kompanisë “SORI-AL”, pasi një mostër makaronash e marrë në kuzhinën e Akademisë rezultoi jokonforme për shkak të pranisë mbi normë të baktereve Escherichia coli dhe Staphylococcus koagulazë-pozitive.
Në vijim të hetimeve, AKU njoftoi se kishte ushtruar kontrolle edhe në ambientet e Garnizonit “Skënderbej”, pranë Forcave të Armatosura, ku përgatitej ushqimi për Akademinë e Sigurisë. Sipas institucionit, problematikat higjieno-sanitare dhe rezultatet jokonforme të analizave çuan në pezullimin e aktivitetit edhe në këtë ambient.
Megjithatë, ditën e sotme AKU ndryshoi qëndrim, duke zhbllokuar aktivitetin e subjektit. Sipas arsyetimit zyrtar, mostrat e higjienës ambientale dhe të pajisjeve të punës, të analizuara pranë Institutit të Sigurisë Ushqimore dhe Veterinarisë, rezultuan brenda normave të lejuara.
Ky ndryshim ka ngritur pikëpyetje mbi mënyrën se si po menaxhohet rasti. Nga njëra anë flitet për produkte me ngarkesë bakteriale mbi normë dhe mungesë të standardeve higjieno-sanitare, ndërsa nga ana tjetër deklarohet se analizat rezultojnë brenda parametrave të lejuar. Deri tani, AKU nuk ka dhënë një sqarim të plotë mbi këtë mospërputhje.
Dyshime shtesë krijon edhe fakti që institucionet kanë dhënë njoftime të njëpasnjëshme ndërkohë që hetimet duket se nuk kanë përfunduar ende. Në raste të tilla, një procedurë më transparente do të kërkonte përfundimin e verifikimeve dhe publikimin e një raporti të plotë zyrtar, në mënyrë që opinioni publik të ketë një pasqyrë të qartë mbi ngjarjen.
Paqartësitë shtohen edhe më tej pas raportimeve se Prokuroria e Tiranës, e cila ka nisur hetimet për rastin, nuk kishte marrë ende dokumentacionin dhe rezultatet përkatëse nga AKU, pavarësisht dy kërkesave zyrtare të dërguara ndaj institucionit.
Në vend që të luajë rolin kryesor në sqarimin e incidentit, mënyra e komunikimit të AKU-së deri tani duket se ka krijuar më shumë konfuzion dhe paqartësi, si për hetimin e ngjarjes ashtu edhe për informimin e publikut.
Rasti kërkon një hetim të plotë dhe transparent, jo vetëm për të zbardhur shkakun e helmimit të 52 studentëve, por edhe për të parandaluar incidente të ngjashme në institucione të tjera ku kompania ofron shërbime ushqimore.
Marrë nga VNA.al
