Të martën, kryetarja e Dhomave të Specializuara të Hagës, Ekaterina Trendafilova, anuloi një konferencë që ishte planifikuar të mbahej në Prishtinë. Kjo, pas një proteste nga veteranët e Ushtrisë Çlirimtare të Kosovës (UÇK) jashtë hotelit ku ajo po qëndronte.
Hysni Gucati, përfaqësues i veteranëve të Kosovës, deklaroi se vizita e Trendafilovës në Kosovë është në dëm të shqiptarëve.
Para konferencës, veteranët hodhën edhe tymuese pranë hotelit ku ndodhej Trendafilova, shoqëruar me thirrjet “UÇK”.
Organizatat që dolën nga lufta, në një reagim të përbashkët, deklaruan të hënën se vizita e kreut të Dhomave të Specializuara ishte e papranueshme dhe një fyerje.
Ata thanë se vizita e saj nuk kishte të bënte fare me drejtësinë dhe transparencën, dhe përmendën gjithashtu “qasjen arrogante të Gjykatës Speciale”.
“E njëjta gjykatë që heshtte për krimet serbe kundër civilëve shqiptarë, sot vjen në Kosovë si një ‘autoritet ligjor’, por i mungon guximi për t’u përballur me opinionin publik. Kjo është hipokrizi e pastër! Ne, OVL, SHIL dhe SHFD, përsërisim kundërshtimin tonë të plotë dhe të palëkundur ndaj kësaj vizite.
U kërkojmë institucioneve të Kosovës të mos bëhen pjesë e kësaj fasade dhe u bëjmë thirrje të gjithë qytetarëve, shoqatave të lindura nga lufta dhe mediave të pavarura që të qëndrojnë pranë të vërtetës dhe sakrificës sonë të përbashkët”, thuhet në reagim.
Shoqata e Veteranëve të UÇK-së tha se vizita e gruas që drejton trupën që mban në burg ish-krerët e luftës, mes tyre ish-presidentin Thaçi, është e papranueshme dhe fyese për “luftën çlirimtare, çdo luftëtar dhe familje”.
Marrë nga Tesheshi.com
