Në 29 nga 30 kontratat e punëve publike të audituara në Ministrinë e Bujqësisë dhe strukturat e saj, Kontrolli i Lartë i Shtetit konstatoi diferenca mes volumeve të punimeve të likuiduara dhe atyre të kryera realisht.
Vlera për të cilën KLSH-ja kërkon rikuperimin e dëmit ekonomik arrin në 18.7 milionë lekë me TVSH, ndërsa auditimi ka gjetur edhe objekte të kolauduara e të marra në dorëzim pa dokumentacionin e kërkuar të ndërtimit.
Kontrolli përfshin kontrata të zbatuara gjatë periudhës 2019-2024. Nga 30 kontrata të përzgjedhura për auditim, vetëm në një prej tyre nuk u raportuan diferenca të tilla, ndërsa në 29 të tjerat KLSH gjeti volume punësh të pakryera në kundërshtim me kontratat e sipërmarrjes.
Për këto raste, audituesit i kanë rekomanduar Ministrisë së Bujqësisë të marrë masa për arkëtimin e rreth 18.7 milionë lekëve, të cilat përfaqësojnë vlerën e punimeve të likuiduara, por të pakryera. Në total, masat për shpërblim dëmi të lidhura me auditimin arrijnë rreth 19.1 milionë lekë, ku pjesa kryesore vjen pikërisht nga kontratat e punëve publike.
Nga auditimi nuk rezultuan vetëm diferenca në volumet e punimeve. KLSH-ja gjeti edhe pesë objekte të marra në dorëzim dhe të likuiduara pavarësisht problematikave me lejen e ndërtimit ose deklaratën paraprake të punimeve.
Mes tyre është “Rrëshqitja Lekël”, ku nuk ishte zgjatur leja në përputhje me afatin e punimeve; rehabilitimi i V-2 në Dropull, ku mungonte deklarata paraprake; mbrojtja nga lumi Vjosë në Kashishtë; rehabilitimi i argjinaturës së Tonës, segmenti Tarin-Perlat; si dhe Markata e Peshkut me Shumicë në Vlorë, për të cilën KLSH-ja konstatoi mungesën e lejes së ndërtimit.
KLSH-ja konstatoi gjithashtu mungesë të dokumenteve kryesore teknike në dosjet e zbatimit, të nevojshme për të provuar kontrollin e cilësisë së punimeve. Raporti thotë se kjo gjë dobëson gjurmueshmërinë e procesit të mbikëqyrjes, kolaudimit dhe certifikimit të sasive dhe materialeve përpara pagesës.
Në rekomandimet përfundimtare, KLSH-ja kërkon që Ministria të rikuperojë dëmin nga sipërmarrësit për punimet e likuiduara dhe të pakryera dhe që objektet të mos kolaudohen pa lejet dhe dokumentacionin teknik të kërkuar.
Marrë nga Ekofin.al
