Një kullë me 30-40 kate do të ngrihet në zemër të Shkodrës, projekt ky i prezantuar këtë të martë me pjesëmarrjen kryebashkiakut Benet Beci dhe kryeministrit Edi Rama.
Ndërtimi i kësaj kulle ka shkaktuar zemërim dhe debat jo vetëm në politikë, por edhe në opinionin publik.
Për këtë arsye është thirrur një protestë kundër ndërtimit të saj.
Këshilltari bashkiak i PD-së në Shkodër, Imeldi Sokoli, ka njoftuar në rrjetet sociale se protesta do të zhvillohet në orën 19:00 të 22 korrikut, tek sheshi “Nënë Tereza”.
“Kulla nuk asht cool n’Shkodër.
Ftoj të gjithë miqtë të na bashkohen në këtë marshim kundër betonizimit të qytetit tonë.
Dy ditë më parë Qeveria dhe Bashkia e Shkodrës prezantuan projektin e një kulle 100 metra të lartë e cila pritet të ndërtohet në zemër të qyetit. Të vënë para faktit të kryer në një kohë kur për projekte kaq të mëdha duhen dëgjesa publike, të shqetësuar për dëmin urban dhe arkitekturor që kjo kullë paralajmëron t’i kanosë Shkodrës, të indinjuar nga mosrespektimi nga ana e institucioneve i të drejtës sonë për qytetin dhe hapësirën që jetojmë, ju bëjmë thirrje të na bashkoheni në protestë, ditën e hënë, më 22 korrik, në orën 19:00, te sheshi “Nënë Tereza”, shkruan Sokoli.
